पुणे: दारू पिताना दोन गटांत झालेल्या वादातून एकावर धारदार शस्त्राने वार करत खुनाचा प्रयत्न करण्यात आला. यानंतर आजूबाजूच्या नागरिकांना शस्त्राचा धाक दाखवत धमकावण्यात आले.
ही घटना आंबेगाव येथील एका आमराईत घडली. याप्रकरणी भारती विद्यापीठ पोलिस ठाण्यात गुन्हा दाखल केला आहे. अलोक राजू कोंढरे (वय 20, रा. जाधवनगर, वडगाव बुद्रुक) असे जखमी झालेल्या तरुणाचे नाव आहे. (latest pune news)
याबाबत ओमकार वडमारे (वय 25, रा. धायरी) याने फिर्याद दिली आहे. त्यानुसार पोलिसांनी गणा ऊर्फ गणेश कदम, अन्या ऊर्फ अनिकेत सोंडे यांच्यासह चौघांविरुद्ध गुन्हा दाखल केला आहे. ही घटना बुधवारी (दि.7) दुपारी तीनच्या सुमारास घडली आहे.
पोलिसांनी दिलेल्या माहितीनुसार, फिर्यादी ओमकार हा डिलिव्हरी बॉयचे काम करतो. तो दुपारी मित्र अलोक कोंढरे आणि त्याच्या इतर काही मित्रांसोबत दारू पिण्यास बसला होता. या वेळी त्यांच्या शेजारी आरोपी येऊन दारू पित बसले.
या वेळी अलोक कोंढरे आणि आरोपी गणेश कदम यांच्यात शाब्दिक वादावादी झाली. यानंतर गणेश कदम तेथून निघून गेला. मात्र, थोड्या वेळानंतर तो साथीदारांसह तेथे आला. त्याने अलोक कोंढरेचा पाठलाग करून आंबेगाव घबाडी येथील उत्कर्ष शाळेजवळ त्याला गाठले.
आरोपी गणेशने कोयत्याने, तर इतर आरोपींनी तलवारीने त्याच्यावर वार केले. यानंतर जाताना नागरिकांना शस्त्रे दाखवत दमदाटी केली. तिथे उभी असलेली एक इको कारही फोडण्यात आली. या प्रकरणाचा तपास सहायक पोलिस निरीक्षक मिथुन परदेशी करत आहेत.
