पारगाव : आंबेगाव तालुक्यातील शिंगवे गावठाण परिसरात गेल्या पंधरा ते वीस दिवसांपासून बिबट्यांचा वावर होता. यामुळे नागरिकांत भीतीचे वातावरण निर्माण झाले होते. वन विभागाला तब्बल तीन आठवड्यांच्या प्रयत्नानंतर बिबट मादीला जेरबंद करण्यात यश मिळाले.
जेरबंद केलेल्या बिबट मादीची वैद्यकीय तपासणी करून पुढील कार्यवाहीसाठी तिला जुन्नर तालुक्यातील माणिकडोह बिबट निवारा केंद्रात हलविण्यात आले. या परिसरात अजूनही बिबट्यांचे बछडे असण्याची शक्यता असल्याचे वन विभागाने स्पष्ट केले. त्यामुळे नागरिकांनी विशेष काळजी घेणे आवश्यक आहे. रात्रीच्या वेळी एकटे बाहेर जाणे टाळावे, लहान मुलांना बाहेर सोडू नये,
तसेच पाळीव जनावरे सुरक्षित ठिकाणी बांधावीत, असे आवाहन मंचर वन विभागाचे वनपरिक्षेत्राधिकारी विकास भोसले यांनी केले आहे. बिबट्याचा किंवा त्याच्या बछड्यांचा वावर दिसल्यास तात्काळ वन विभागाला माहिती देण्याचेही आवाहन वन परिमंडल अधिकारी आर. एम. फुलमाळी, वनरक्षक बी. एच. पोतरे, दत्ता राजगुरव यांनी केले आहे.
