लोणावळा : पुढारी वृत्तसेवा : ऐन दिवाळीमध्ये भाऊबीज आणि पाडवा सणाच्या दिवशी आपल्या मित्रांसोबत लोणावळ्यातील भुशी धरणावर फिरायला आलेल्या एका 17 वर्षीय अल्पवयीन मुलाचा पाण्यात बुडून मृत्यू झाला. रोहन जोगींदर लाहोट (रा. ट्राझीट कॅम्प, रमाबाई कॉलनी, घाटकोपर, मुंबई) असे मृत्युमुखी पडलेल्या मुलाचे नाव आहे. मिळालेल्या माहितीनुसार, ट्युशन क्लास शिक्षक अमितकुमार जगदंबशरन पांडे आणि क्लासमधील इतर सहा मुलांसोबत रोहन लोणावळा येथे फिरण्यासाठी आला होता.
लोणावळा शहर पोलिसांच्या मदतीने शिवदुर्ग मित्रचे सचिन गायकवाड, योगेश उंबरे, अशोक उंबरे, अमित भोसले, ओंकार पडवळ, सागर कुंभार यांनी रोहन याचा मृतदेह पाण्यातून बाहेर काढला. ऐन सणासुदीच्या दिवशी ही दुर्दैवी घटना घडल्याने सर्वत्र हळहळ व्यक्त करण्यात येत आहे.
शिवदुर्ग मित्रच्या सदस्यांनी केली मदत
बुधवारी (दि. 26) दुपारी 2 वाजण्याच्या सुमारास तो भुशी धरणाच्या बॅक वॉटरमध्ये उतरला असताना पाय घसरून पाण्यात बुडाला. या घटनेची माहिती समजताच शिवदुर्ग मित्रच्या सदस्यांनी धरणाकडे धाव घेतली आणि रोहनचा मृतदेह पाण्यातून बाहेर काढला.
