Pimpri News : शहरात बांधकाम मजुरांची सुरक्षितता वार्‍यावर
पिंपरी : पुढारी वृत्तसेवा : बांधकाम मजुरांच्या डोक्यावर हेल्मेट नाही, पायात गमबूट, हॅन्डग्लोव्हज नसणे, काम सुरू असताना कमरेला सीटबेल्ट नसणे, बांधकामाच्या ठिकाणी सुरक्षेच्या दृष्टीने सुरक्षा जाळी नसणे अशा विविध बाबी मंगळवारी (दि. 5) दैनिक पुढारीच्या प्रतिनिधीने केलेल्या प्रत्यक्ष पाहणीत आढळून आले. त्यामुळे बांधकाम मजुरांची सुरक्षितता वार्‍यावर आहे का? असा प्रश्न निर्माण होत आहे. मोठ्या बांधकाम प्रकल्पांच्या ठिकाणी मात्र, कर्मचार्‍यांनी ही सुरक्षा साधने घातली असल्याचे चित्र पाहण्यास मिळाले.
कोथरुड येथे पडदी बसविण्याचे काम करत असताना पहिल्या मजल्यावरुन खाली पडल्याने नुकताच एका बांधकाम मजुराचा मृत्यू झाला. त्यामुळे बांधकाम मजुरांच्या सुरक्षेचा प्रश्न ऐरणीवर आला आहे. या पार्श्वभूमीवर पिंपरी-चिंचवड शहरात बांधकामांच्या ठिकाणी नेमकी काय स्थिती आहे, याची दैनिक पुढारीच्या प्रतिनिधीने माहिती घेतली असता बर्‍याच बांधकामाच्या ठिकाणी बांधकाम मजुरांची पुरेशी
सुरक्षितता घेतली जात नसल्याचे चित्र पाहण्यास मिळाले.
- पिंपरी : येथील एका बांधकाम प्रकल्पाच्या ठिकाणी बांधकाम मजूर टेम्पोमधून सिमेंटच्या वीटा खाली करत होते. त्यांनी डोक्यावर फक्त फडके गुंडाळले होते. हेल्मेट घातलेले नव्हते. ना पायात गमबुट होते ना हॅन्डग्लोव्हज होते. बांधकामाच्या ठिकाणी सुरक्षेच्या दृष्टीने आवश्यक सुरक्षा जाळी मात्र उभारलेली होती.
- चिंचवड : येथील दोन ते तीन बांधकामांच्या ठिकाणी भेट दिली असता तेथेदेखील बांधकाम मजुरांच्या सुरक्षा साधनांकडे दुर्लक्ष करण्यात आल्याचे चित्र पाहण्यास मिळाले. ना डोक्यावर हेल्मेट ना पायात गमबुट, अंगावर हाय-व्हिस जॅकेटदेखील नव्हते. सुरक्षा गॉगल, गुडघ्यावर घालावयाचे पॅड या बाबींकडे तर साफ दुर्लक्ष करण्यात आले होते. काही बांधकामांच्या ठिकाणी सुरक्षा जाळ्या होत्या. तर, काही ठिकाणी या जाळ्याच बसविलेल्या नव्हत्या.
- चिंचवड स्टेशन : येथे सुरू असलेल्या मोठ्या बांधकाम प्रकल्पाच्या ठिकाणी मात्र काही प्रमाणात सकारात्मक चित्र पाहण्यास मिळाले. येथील बांधकाम कामगारांनी हाय-व्हिस जॅकेट घातलेले होते. त्याशिवाय, त्यांच्या डोक्यात हेल्मेट, पायात गमबुट होते. तसेच, बांधकामाच्या ठिकाणी आवश्यक सुरक्षा म्हणून सुरक्षा जाळ्या बसविलेल्या होत्या.
सहाय्यक कामगार आयुक्त कार्यालयाचे दुर्लक्ष
बांधकाम कामगारांच्या सुरक्षिततेकडे सहायक कामगार आयुक्त कार्यालयाकडून दुर्लक्ष होत असल्याने बांधकाम कामगारांच्या बाबतीत ही परिस्थिती पाहण्यास मिळत आहे. बांधकाम उद्योगात सर्वात जास्त असंघटित कामगार आहेत. राज्य सरकारने बांधकाम कामगारांसाठी महाराष्ट्र इमारत व इतर बांधकाम कामगार कल्याण मंडळाची स्थापना केलेली आहे. बांधकाम कामगारांमध्ये गवंडी, सेंट्रिंग, सुतार, प्लंबर, फरशी कामगार, पॉलिश, वेल्डर, पेंटर यांच्यासह 18 कामगारांचा समावेश होतो. गवंडी, सेट्रिंग, पेंटर, फरशी फिटिंग करणार्या कामगारांसह अन्य कामगारांना प्रशिक्षण दिले जात नाही. मजुरी करतच हे कामगार शिकत असतात. त्यामुळे कामावर सुरक्षितता कशी बाळगावी, याचे प्रशिक्षण त्यांना दिले जाते. पण बांधकामाच्या साईटवरील विकसक, अभियंता यांनी सुरक्षिततेचे ज्ञान घेतलेले असते. त्यामुळे किमान त्यांनी याबाबत दक्षता घेणे गरजेचे आहे.
बांधकाम मजुरांच्या सुरक्षा साधनांसाठी कामगार खात्याकडे असलेल्या निधीचा पुरेपुर वापर व्हायला हवा. बांधकाम मजुरांच्या कल्याणासाठी हा पैसा वापरला गेला पाहिजे. विकसकाने बांधकाम प्रकल्पाचा विमा काढावा. कामगारांचा अपघाती मृत्यू होऊ नये, यासाठी आवश्यक दक्षता घ्यावी. बांधकामाच्या ठिकाणी सुरक्षा साधने असल्याशिवाय बांधकाम मजुरांना प्रवेश देऊ नये. ज्या मजुरांकडे ही सुरक्षा साधने नसतील त्यांना ती विकसकाने उपलब्ध करुन द्यावी.
– बाबा कांबळे,
संस्थापक-अध्यक्ष, कष्टकरी कामगार पंचायत
बांधकाम कामगारांनी कामगार कल्याण मंडळाकडे नोंदणी केली असल्यास त्यांना सुरक्षा साधने मिळतात. त्यामुळे जास्तीत जास्त कामगारांनी त्यासाठी नोंदणी करून घ्यावी. या कामगारांकडे सुरक्षा साधने नसतील तर ती उपलब्ध करून देण्याची जबाबदारी ही कंत्राटदार आणि आस्थापनांची आहे.– काशिनाथ नखाते, कामगार नेते.
हेही वाचा