मंचर : पुढारी वृत्तसेवा : निरगुडसर (ता. आंबेगाव) ग्रामपंचायतीच्या सरपंचपदी शिवसेना शिंदे गटाचे रवींद्र जनार्दन वळसे पाटील यांची निवड झाली. त्यांनी राष्ट्रवादी काँग्रेस अजित पवार गटाचे संतोष बबन टाव्हरे याँचा 135 मतांनी पराभव केला. निरगुडसर हे सहकारमंत्री दिलीप वळसे पाटील यांचे गाव आहे. त्यामुळे रवींद्र वळसे यांचा विजय हा सहकारमंत्री दिलीप वळसे पाटील यांना राजकीय धक्का मानला जात आहे. सरपंचपदी शिवसेनेचा उमेदवार विजयी झाला असला, तरी ग्रामपंचायतीवर राष्ट्रवादी काँग्रेसचे सर्वाधिक सदस्य निवडून आले. रवींद्र वळसे पाटील याच्या धर्मराज पॅनलचे 3 सदस्य निवडून आले. सहकारमंत्री दिलीप वळसे पाटील याच्या निरगुडेश्वर पॅनेलचे 7 सदस्य निवडून आले.
संबंधित बातम्या :
तसेच तीन अपक्षांनी विजय मिळविला. निरगुडसर हे गाव सहकारमंत्री दिलीप वळसे पाटील यांचे गाव असल्याने या निवडणुकीकडे सर्वांचे लक्ष लागले होते. मात्र, सरपंचपदाच्या निवडणुकीत राष्ट्रवादीचे निरगुडेश्वर ग्रामविकास पॅनलचे सरपंचपदाचे उमेदवार संतोष टाव्हरे यांचा पराभव झाला. सरपंचपदी शिवसेनेचे रवींद्र वळसे पाटील विजयी झाले. त्यांना 1483 मते मिळाली, तर संतोष टाव्हरे यांना 1348 मते मिळाली. अन्य उमेदवार नीलेश वळसे पाटील यांना 184 मते मिळाली.
सदस्यपदी निवडून आलेले उमेदवार व त्यांना मिळालेली मते पुढीलप्रमाणे – पूजा बाबाजी थोरात (324), राहुल झुंजारराव हांडे (316), भाऊसाहेब फकीरा वळसे(383), वैभव हरिभाऊ वळसे(397), अशोक ज्ञानेश्वर कानसकर (384), अशोक मधुकर टाव्हरे (402),संतोष किसन कोरके(306), शिल्पा महेश राऊत (309), सारिका प्रकाश कडवे (331), अक्षदा सुभाष टाव्हरे (293). संगीता हिंगे, संगीता किरवे, सायली वळसे पाटील बिनविरोध निवडून आल्या.
ग्रामस्थांच्या सहकार्यामुळे विजय…
माझा विजय हा निरगुडसर गावातील सर्व ग्रामस्थांनी केलेल्या सहकार्यामुळे तसेच नातेवाईक, मित्रमंडळी यांच्या सहकार्याने झाला आहे. हा विजय मी माझे भाऊ स्वर्गीय चंद्रकांत वळसे पाटील यांना अर्पण करतो, असे उद्गार नवनिर्वाचित सरपंच रवींद्र जनार्दन वळसे पाटील यांनी व्यक्त केले. रवींद्र वळसे पाटील सरपंचपदी 135 मतांनी निवडून आल्यानंतर त्यांनी घोडेगाव येथे पत्रकारांशी संवाद साधला असता त्यांना अश्रू अनावर झाले होते.
