सहकार आयुक्तालयाविरोधात लेखापरीक्षकांचा एल्गार

पुणे : पुढारी वृत्तसेवा :  राज्य सरकारने सहकार विभागातील लेखापरीक्षण कक्षातील सर्व कर्मचार्‍यांना लेखापरीक्षक या पदाच्या कर्तव्यासाठी नियुक्ती दिली आहे. त्यामुळे सहकार आयुक्तालयाच्या नामतालिकेवर (पॅनेल) विभागातील लेखापरीक्षकांना नोंदणी करण्याच्या सक्तीला महाराष्ट्र स्टेट को-ऑप. डिपार्टमेंटल ऑडिटर्स असोसिएशनने विरोध केला आहे. त्यामुळे आयुक्तालय विरुध्द लेखापरीक्षक संघटना, असा नवा संघर्ष दिसण्याची चिन्हे आहेत. सहकार आयुक्तालयाने लेखा परीक्षकांच्या पॅनेलसाठी परिपत्रक जारी केले आहे.

त्यावर बहिष्कार टाकण्याचे आवाहन ऑडिटर्स असोसिएशनच्या वतीने पत्रकान्वये केले आहे. त्यामध्ये म्हटले आहे की, सहकार आयुक्तालयाच्या परिपत्रकानुसार कोणीही नामतालिकेसाठी ऑनलाइन नोंदणी करू नये. कारण, शासकीय लेखापरीक्षकांना नोंदणी करण्याची सक्ती करणे, ही बाब संघटनेला मान्य नाही. त्यासाठी संघटनेने सक्तीला यापूर्वीही विरोध केला असून, आजही विरोध असल्याची माहिती संघटनेकडून देण्यात आली.