पुणे : पुढारी वृत्तसेवा : डॉ. नरेंद्र दाभोलकर यांच्या खून प्रकरणाच्या तपासात सहा प्रत्यक्षदर्शी साक्षीदार नोंदविण्यात आले होते. याखेरीज, आणखी एक सातवा साक्षीदार होता. त्याची मी तपासणी केली का हे मला सांगता येणार नाही. माझ्याकडे त्याचे रेकॉर्ड नसून त्यातील दोन साक्षीदारांना सोडून बाकी कुठल्याच साक्षीदारांना संशयित आरोपींची छायाचित्रे दाखविली नाहीत. ती का दाखविली नाहीत, हे सांगता येणार नसल्याची माहिती सीबीआयचे तत्कालीन तपासी अधिकारी एस. आर. सिंग यांनी विशेष न्यायाधीश पी. पी. जाधव यांच्या न्यायालयाला दिली.
महाराष्ट्र अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांच्या खून प्रकरणात सिंग यांची उलटतपासणी घेण्यात येत आहे. बचाव पक्षाच्या वतीने अॅड. वीरेंद्र इचलकरंजीकर यांनी मंगळवारी उलटतपासणी घेतली. तपासाच्या अनुषंगाने सिंग यांच्यावर बचाव पक्षाकडून प्रश्नांची सरबत्ती केली जात आहे. पुढील सुनावणी 5 सप्टेंबर रोजी होणार आहे. या प्रकरणात डॉ. वीरेंद्रसिंह तावडे, सचिन अंदुरे, शरद कळसकर, अॅड. संजीव पुनाळेकर आणि विक्रम भावे या पाच जणांवर आरोप निश्चित करण्यात आले आहेत. डॉ. दाभोलकर यांची 20 ऑगस्ट 2013 रोजी महर्षी विठ्ठल रामजी शिंदे पुलावर गोळ्या झाडून हत्या करण्यात आली होती.
बंदुकीतील गोळ्या या खडकी फॅक्टरीमधल्या होत्या हे माहिती असूनही फॅक्टरीमधून गोळ्या कशा बाहेर गेल्या याबाबत तपास केला का? असे इचलकरंजीकर यांनी सिंग यांनी विचारले, पण तसा तपास केला नाही, असे सिंग यांनी न्यायालयात स्पष्ट केले. सारंग अकोलकर आणि विनय पवार यांच्यावर पाच लाख रुपयांचे बक्षीस लावले होते हे खरे आहे का? असे बचाव पक्षाने विचारले असता, त्यांनी गोळ्या झाडल्या, असे माझे म्हणणे नव्हते. ते केवळ संशयित असल्याचे सिंग यांनी सांगितले. अंदुरे आणि कळसकर येरवडा कारागृहात होते याची माहिती होती. साक्षीदारही पुण्यातीलच आहेत, हेही अवगत होते. पण मी त्यांची कारागृहातील ओळख परेड केली नसल्याचेही सिंग यांनी सांगितले. खंडेलवाल आणि नागोरीला आम्ही क्लिन चिट दिली नसल्याचेही त्यांनी नमूद केले.
हेही वाचा :
