पुणे, पुढारी वृत्तसेवा: पुणे सिटी एड्स कंट्रोल सोसायटीच्या देणगीदारांना कलम 80 जी अंतर्गत करसवलतीचा लाभ घेता येणार आहे. याबाबत, महापालिकेच्या आयटी विभागाकडून तात्पुरते प्रमाणपत्र प्राप्त झाले आहे. पुढील काही महिन्यांत अंतिम प्रमाणपत्र मिळणे अपेक्षित आहे. सेलकडे जमा झालेला निधी शहरातील एड्स प्रतिबंध आणि नियंत्रण कार्यक्रम मजबूत करण्यासाठी वापरला जाईल.
एड्स नियंत्रण आणि प्रतिबंध कार्यक्रमात सुधारणा करण्याच्या उद्देशाने आणि नागरी संस्थेवर अतिरिक्त आर्थिक भार पडू नये, या उद्देशाने आरोग्य विभागाने देणग्या गोळा करण्यासाठी आयटी विभागाच्या परवानगीसाठी अर्ज करण्याचा निर्णय घेतला. दोन महिन्यांत अंतिम प्रमाणपत्र मिळेल, असे अधिकार्‍यांनी सांगितले.
महापालिकेने यापूर्वीच धर्मादाय आयुक्तालयात ट्रस्टची नोंदणी केली होती आणि परवानगी देण्याची विनंती महापालिका आयुक्तांना केली होती. गतवर्षी परवानगी मिळाल्यानंतर ही प्रक्रिया सुरू करण्यात आली. ही प्रक्रिया सहा महिन्यांपूर्वी सुरू झाली असून, आयकर विभागाकडून मंजुरी आणि परवानगी मिळाली आहे.
अंतिम प्रमाणपत्र प्राप्त झाल्यावर खाते क्रमांक आणि इतर तपशील जाहीर करण्यात येणार आहे. देणग्यांमधून मिळालेला निधी औषध खरेदी, तपासणी सुविधा सुधारण्यासाठी आणि एचआयव्ही बाधित रुग्णांना पोषण आणि आहारासाठी आर्थिक मदत करण्यासाठी वापरला जाऊ शकतो. हा उपक्रम यशस्वी झाल्यास आरोग्य विभाग शहरातील क्षयरोग नियंत्रण आणि निर्मूलन कार्यक्रमांसारख्या सार्वजनिक आरोग्य कार्यक्रमांसाठीही प्रक्रिया राबवू शकेल, असे अधिकार्‍यांनी सांगितले.
पुणे सिटी एड्स कंट्रोल सोसायटी ट्रस्टला आयकर विभागाकडून परवानगी मिळाली आहे. त्यामुळे देणगीदारांना कलम 80 जी, 12 ए आणि 12 एए अंतर्गत कर लाभांचा दावा करण्याची परवानगी दिली आहे. एड्स प्रतिबंध आणि नियंत्रण कार्यक्रमासाठी नागरिक पैसे देऊ शकतात. हा निधी शहरातील कार्यक्रमांच्या बळकटीकरणासाठी आणि प्रभावी अंमलबजावणीसाठी वापरला जाईल.
– डॉ. सूर्यकांत देवकर, सहायक आरोग्य अधिकारी, पुणे महापालिका
