तळेगाव ढमढेरे (ता. शिरूर); पुढारी वृत्तसेवा : कासारी (ता. शिरूर) येथील एक कुटुंब शेजारील मुलीच्या लग्नासाठी कोरेगाव भीमा येथे गेले असता चोरट्यांनी घराच्या दरवाजाचे कुलूप तोडून तब्बल चार लाखांचा ऐवज चोरून नेला. शिक्रापूर पोलिस ठाण्यात अज्ञात चोरट्यावर गुन्हे दाखल केले आहेत. अमित सातपुते (वय 35, रा. रासकर मळा, कासारी) यांनी फिर्याद दिली आहे.
अमित सातपुते हे कुटुंबीयांसह घराला कुलूप लावून शेजारी राहणार्या कुंडलिक नवले यांच्या मुलीच्या लग्नासाठी कोरेगाव भीमा येथे गेले होते. सायंकाळी पाच वाजण्याच्या सुमारास अमित यांची आई लग्नाहून घरी आली असता तिला घराच्या दरवाजाचे कुलूप तुटलेले, कपाटातील सर्व कपडे अस्ताव्यस्त पडल्याचे दिसून आले. घरात पाहणी केली असता, घरातील दोन्ही कपाटे उघडी तसेच सर्व साहित्य फरशीवर पडल्याचे दिसले.
कपाटातील दोन लाख रुपये व चार तोळे सोन्यासह काही चांदीचे दागिने चोरीला गेल्याचे निदर्शनास आले. घटनेची माहिती मिळताच सहाय्यक पोलिस निरीक्षक वैभव पवार, सहाय्यक पोलिस उपनिरीक्षक जितेंद्र पानसरे, हवालदार शिवाजी चितारे, अमोल दांडगे, हवालदार योगेश नागरगोजे आदींनी घटनास्थळी भेट दिली. पोलिस निरीक्षक प्रमोद क्षीरसागर यांच्या मार्गदर्शनाखाली सहायक पोलिस निरीक्षक नितीन अतकरे व रोहिदास पारखे हे तपास करत आहेत.
