पिंपरी; पुढारी वृत्तसेवा : पिंपरी-चिंचवड शहरात मोकाट व भटक्या कुत्र्यांचा उपद्रव रोखण्यात पिंपरी-चिंचवड महापालिका प्रशासन अपयशी ठरले आहे. त्यामुळे शहरातील नागरिकांना भटकी कुत्री चावण्याच्या घटना वाढतच आहेत. त्या विरोधात शिवसेनेचे उपशहरप्रमुख नेताजी काशिद यांनी थेट राज्य मानवी हक्क आयोगात दावा दाखल आहे. या प्रकरणात आयोग काय भूमिका घेते, याची उत्सुकता लागली आहे.
या संदर्भात 'पुढारी'ने 'स्मार्ट सिटीत कुत्र्यांची दहशत' असे ठळक वृत्त 3 एप्रिल 2023 ला प्रसिद्ध केले होते. तसेच, 'कुत्र्यांच्या नसबंदी चौकशीबाबत संशय' हे वृत्त 9 एप्रिल 2023 ला प्रसिद्ध केले होते. त्या वृत्तांचा आधार घेत काशिद यांनी हा दावा दाखल केला आहे. हयुमन राइट असोशिएशन फॉर प्रोटेक्शनचे अध्यक्ष एम. डी. चौधरी यांच्यामार्फत काशिद यांनी हा दावा दाखल केला आहे.
पिंपरी-चिंचवड शहरात 2022-23 या एका वर्षात तब्बल 10 हजार 350 नागरिक व मुलांना मोकाट व भटक्या कुत्र्यांनी चावा घेतल्याच्या घटना घडल्या आहेत. त्यामुळे शहरातील नागरिकांमध्ये मोकाट व भटक्या कुत्र्यांची दहशत निर्माण झाली आहे. महापालिका प्रशासन मोकाट कुत्र्यांची संख्या नियंत्रणात आणण्यासाठी कुत्र्यांची नसबंदी करण्यासाठी कोट्यवधी रुपये खर्च करीत असतानाही शहरात मोकाट कुत्र्यांची संख्या मोठ्या प्रमाणात वाढत आहे.
अशा मोकाट व भटक्या कुत्र्यांकडून लहान मुले, महिला, ज्येष्ठ नागरिकांवर हल्ले होण्याच्या घटनाही वाढत आहेत. मोकाट कुत्र्यांचा उपद्रव रोखण्याच्या वारंवार तक्रारी व मागणी करूनदेखील प्रशासन कोणत्याही ठोस उपाययोजना राबवित नसल्याचे चित्र आहे. त्यामुळे नेताजी काशिद यांनी राज्य मानवी हक्क आयोगात दावा दाखल आहे. या प्रकरणाबाबत आयोग काय भूमिका घेत यांची उत्सुकता लागली आहे.
