पुणे : शिवराज्याभिषेक तथा शिवस्वराज्य दिना निमित्त शुक्रवार, दिनांक ६ जून रोजी सकाळी ९ वाजता शिवाजीनगर येथील एसएसपीएमएस संस्थेच्या प्रांगणातील शिवरायांच्या जगातील पहिल्या भव्य पुर्णाकृती अश्वारुढ स्मारक व शिवराज्याभिषेक शिल्पासमोर भगव्या स्वराज्यध्वजासह ५१ फुट उंच शिवशक राजदंड स्वराज्यगुढी उभारण्यात येणार आहे, अशी माहिती शिवजयंती महोत्सव समितीचे संस्थापक अध्यक्ष अमित गायकवाड यांनी दिली.
या सोहळ्याला शिवकालीन ऐतिहासिक सर्व स्वराज्यघराणी, स्वराज्यबांधव व महिलावर्ग उपस्थित राहणार आहेत. समितीच्या आवाहनाला प्रतिसाद देत श्रीमंत दगडूशेठ हलवाई गणपती, तुळशीबाग मंडळ, सेवा मित्र मंडळ, साईनाथ मंडळ, लक्ष्मीबाई दत्त मंदिर यासह ३६० गणेशोत्सव मंडळे तसेच शिवकालीन सरदारांच्या वंशजांकडून शिवनेरी, राजगड, तोरणा, पुरंदर, सिंहगड, संग्रामदुर्ग यासह असंख्य किल्ल्यावर शिवशक राजदंड स्वराज्यगुढी उभारुन साजरा होणार आहे.
पुण्यामध्ये लालमहाल, एसएसपीएमएस येथील छत्रपती शिवाजी महाराज स्मारक, छत्रपती संभाजी महाराज स्मारक डेक्कन, शनिवारवाडा यांसह अनेक ठिकाणी स्वराज्यगुढी उभारली जाणार आहे. अमित गायकवाड म्हणाले, शिवरायांचा जिरेटोप, सुवर्णहोन, जगदंब तलवार, वाघनखे, शिवमुद्रा या पंचशुभ चिन्हांनी अलंकृत भगवा स्वराज्यध्वज निर्माण करण्यात आला आहे. ६ जून हा दिवस महाराष्ट्र शासनाने “सार्वजनिक शिवस्वराज्य दिन” म्हणून जाहिर करावा ह्या गायकवाड यांनी २०१३ पासुन सातत्त्याने केलेल्या मागणीला, आवाहनाला प्रतिसाद देत २०२१ साली तत्कालीन ग्रामविकास मंत्री हसन मुश्रीफ आणि उच्च व तंत्र शिक्षण मंत्री उदय सामंत यांनी “सार्वजनिक शिवस्वराज्य दिन” म्हणून शासकीय परिपत्रक काढून आपआपल्या मंत्रालया तर्फे साजरा करण्यास सुरुवात केली.
महाराष्ट्रातील ३३ जिल्हा परिषदा, ३५१ पंचायत समित्या आणि सुमारे ४३,००० गावांत त्याचबरोबरीने महाराष्ट्रातील सर्व अकृषीक, अभिमत, स्वयंअर्थसाहाय्यिक विद्यापीठ, महाविद्यालये, अभियांत्रिकी महाविद्यालये, तंत्र निकेतने आणि तत्सम शिक्षण संस्थामंध्ये हा दिवस साजरा होण्यास सुरुवात झाली.
