पिंपरी : ग्राहक म्हणून दुकानात आलेल्या तरुणाने सोन्याचे दागिने चोरून नेण्याचा प्रयत्न केला. दुकानदाराने त्याला पकडून पोलिसांच्या स्वाधीन केले. ही घटना शुक्रवारी (दि. 17) दुपारी साडेबाराच्या सुमारास माणिक चौक, चाकण येथील रेणुका ज्वेलर्स या दुकानात घडली. सर्फराज ऊर्फ सोनू अन्सारी (19, रा. बर्गेवस्ती, चाकण. मूळ रा. जमोरी, ता. रोहतास, बिहार) असे अटक आरोपीचे नाव आहे. याप्रकरणी प्रशांत दत्तात्रय बागडे (46, रा. चाकण) यांनी चाकण पोलिस ठाण्यात फिर्याद दिली आहे.
फिर्यादी यांचे माणिक चौक चाकण येथे रेणुका ज्वेलर्स हे दुकान आहे. शुक्रवारी दुपारी फिर्यादी आणि त्यांच्या पत्नी दुकानात असताना आरोपी ग्राहक बनून दुकानात आला. कानातले खरेदी करण्याचा बहाणा करून आरोपीने फिर्यादी आणि त्यांच्या पत्नीची नजर चुकवून 25 हजार रुपये किमतीची सोन्याची रिंग चोरली. रिंग घेऊन पळून जात असताना हा प्रकार फिर्यादी यांच्या लक्षात आला. त्यांनी लोकांच्या मदतीने सर्फराज याला पकडले आणि पोलिसांच्या ताब्यात दिले.
