पिंपरी : बसमधून प्रवास करणार्या सहप्रवाशाने महिलेसोबत गैरवर्तन करत विनयभंग केला. हा प्रकार मंगळवारी (दि. 21) मध्यरात्री दीड वाजता पुणे-मुंबई द्रुतगती मार्गावर उर्से टोल नाक्याजवळ घडला. चंद्रकांत भिकाजी जाधव (44, रा. लिंबोनी बाग, मुंबई) असे गुन्हा दाखल झालेल्याचे नाव आहे. याप्रकरणी पीडित महिलेने शिरगाव पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी महिला मंगळवारी मध्यरात्री फलटण ते मुंबई असा बसने प्रवास करीत होत्या. बसप्रवासात चंद्रकांत जाधव हा फिर्यादी यांच्या शेजारी बसला होता. बस पुणे-मुंबई द्रुतगती मार्गाने जाताना उर्से टोलनाक्याजवळ आली असता चंद्रकांत जाधव याने झोपेचे सोंग घेऊन महिलेशी गैरवर्तन करून त्यांचा विनयभंग केल्याचे फिर्यादीत म्हटले आहे. शिरगाव पोलिस तपास करीत आहेत.
