पुणे : हडपसरमधील हांडेवाडी भागात असलेल्या भाजी मंडईत मध्यरात्री आग लागल्याची घटना घडली. या घटनेत भाजीपाल्याचे ९० स्टाॅल जाळून खाक झाले. सुदैवाने या आगीच्या घटनेत कोणतीही जीवितहानी झाली नाही. या आगीत भाजीपाल्याचे नुकसान झाले असून अग्निशमन दलाच्या जवानांनी आग आटोक्यात आणली आहे. या आगीमागचे कारण अद्याप समजू शकले नाही.
हांडेवाडी रस्त्यावर चिंतामणीनगर परिसरात भाजी मंडईत मध्यरात्री दोनच्या सुमारास आग लागली. आग लागल्यानंतर लाकडी स्टाॅलने पेट घेतला. स्टाॅलमध्ये भाजीपाला आणि साहित्य होते. आग लागल्याची माहिती मिळाल्यानंतर अग्निशमन दलाच्या जवानांनी घटनास्थळी धाव घेत पाण्याचा मारा करुन आग आटोक्यात आणली. आगीत भाजीपाल्याचे ९० स्टाॅल भस्मसात झाले आहेत. आगीमागचे निश्चित कारण समजू शकले नाही. शाॅर्टसर्किटमुळे आग लागल्याची शक्यता अग्निशमन दलाने व्यक्त केली आहे.
