नारायणगाव (पुणे), पुढारी वृत्तसेवा: वीज चोरी करून वीज वितरण कंपनीचेआर्थिक नुकसान केल्याप्रकरणी दोन जणांवर गुन्हा दाखल केला असल्याची माहिती नारायणगाव पोलीस स्टेशनचे सहाय्यक पोलीस निरीक्षक पृथ्वीराज ताटे यांनी दिली. या प्रकरणात एक शेतकरी तर दुसरा हॉटेल मालक असून जिल्हा दूध संघाच्या माजी अध्यक्षाचा मुलगा आहे.
राकेश दरंदाळे ( रा. नारायणगाव, ता. जुन्नर), गौतम रमेश भुजबळ ( रा. वारूळवाडी, ता. जुन्नर) असे गुन्हा दाखल करण्यात आलेल्यांची नावे असून या बाबतची फिर्याद वीज कंपनीचे सहाय्यक अभियंता ऋषिकेश बनसोडे यांनी दिली आहे. त्यांनी पोलिसांना दिलेल्या माहिती नुसार गौतम भुजबळ याचे पुणे नाशिक महामार्गालगत डिलिशियस नावाचे हॉटेल आहे. गौतम हा जिल्हा दूध संघाच्या माजी अध्यक्षांचा मुलगा असून भुजबळ याने मीटर जवळ वायर ट्यापींग करत बायपास कनेक्शन करून ६७ हजार ६७० रुपयांची ३ हजार ५०१ युनिट विज चोरी केली असल्याचे तपासणीत आढळून आले.
तर, राकेश दरंदाळे याने वीज वाहक तारेवर अवैधरित्या आकडा टाकून कृषी पंप सुरू करून तेरा हजार रुपयांची १ हजार ६३४ युनिट विज चोरी केली असल्याचे तपासणीत आढळून आले. दोघांनाही वीज चोरी केल्या प्रकरणी तडजोड रक्कम भरण्यासाठी मुदत देण्यात आली होती. मात्र संबंधित व्यक्तींनी वीज चोरीचे बील भरण्यास टाळाटाळ केल्याने त्यांच्या विरोधात सहाय्यक अभियंता ऋषिकेश बनसोडे यांनी दिलेल्या तक्रारी वरून गुन्हा दाखल करण्यात आला आहे.
