चाकण; पुढारी वृत्तसेवा : पुणे-नाशिक महामार्गावरील प्रचंड वाहतूक कोंडीमधून मार्ग काढण्यासाठी एलिव्हेटेड कॉरिडॉरची मागणी केंद्रीय मंत्री नितीन गडकरी यांच्याकडे करण्यात आली होती; ती मान्य होऊन 6 लेन (सहापदरी) रस्त्याऐवजी 12 लेन रस्ता मंजूर झाल्याची माहिती पुणे-नाशिक राष्ट्रीय महामार्गाचे समन्वयक दिलीप मेदगे यांनी दिली.
पुणे-नाशिक महामार्गावर वाढणारी प्रचंड वाहतूक व त्यामुळे होणारी वाहतूक कोंडी, हा विषय मागील काही वर्षांत अत्यंत जटिल झाला आहे. उत्तर पुणे जिल्ह्यातील नाशिक, संगमनेर, आळेफाटा तसेच नारायणगावकडून येणारे व चाकण औद्योगिक क्षेत्राच्या प्रचंड वाढलेल्या लोकसंख्येमुळे या रस्त्यावर प्रचंड ताण निर्माण झालेला आहे. दररोज नागरिक वाहतूक कोंडीला सामोरे जात आहेत.
सन 2004 मध्ये चारपदरी रस्त्याचे काम पूर्ण झाल्यानंतर या रस्त्यावर कोणतेही नियोजन झाले नाही. 20 वर्षांमध्ये मोठ्या प्रमाणावर या महामार्गावर वाहनांची संख्या वाढली. दोन वर्षांपूर्वी सहापदरी रस्त्याचे नियोजन इंद्रायणी नदी ते राजगुरुनगर, असे करण्यात आले होते. 640 कोटींची निविदा प्रक्रिया त्या वेळी रद्द करण्यात आली.
दरम्यान, चाकण चौकातील उड्डाणपूल सोडला तर यामध्ये एवढ्या मोठ्या प्रमाणावर वाहतूक कोंडीतून काही मार्ग निघेल, अशी परिस्थिती नसल्यामुळे एलिव्हेटेड कॉरिडॉरची मागणी महामार्गाचे समन्वयक दिलीप मेदगे यांनी केंद्रीय मंत्री नितीन गडकरी यांना केली होती. ती मान्य होऊन सहापदरी रस्त्याऐवजी 12 लेन रस्ता मंजूर झाला.
सध्या यामध्ये अजून महत्त्वाचा बदल करण्यात आला असून, नाशिक फाटा ते मोशी या दहा किलोमीटर लांबीमध्ये 60 मीटर रुंदीने जमीन अधिग्रहण केलेली असल्याने या जमिनीवर सहा लेन व दोन सेवारस्त्यांच्या चार लेन, अशा एकूण दहा लेन तसेच उड्डाणपुलावर आठ लेन व त्याच उड्डाणपुलाच्या दुसर्या मजल्यावर 24.10 मीटरमध्ये सहा लेन, दुसर्या मजल्यावर पुलाचे प्रस्तावित नियोजन करण्यात येत आहे. सध्याच्या निविदा प्रक्रियेमध्ये त्याचा समाविष्ट होणार नाही.
भविष्यातील 50 वर्षांचे नियोजन
भविष्यातील 50 वर्षांच्या वाहतुकीचे नियोजन यातून करण्याचे निश्चित झाले आहे. जानेवारी 2023 च्या महिनाअखेर याची निविदा प्रक्रिया पार पाडली जाईल. ईपीसी पद्धतीने या बांधकामाला 36 महिन्यांमध्ये पूर्ण करण्यात येईल. या 27 किलोमीटरसाठी अंदाजे 7 हजार कोटी रुपयांचा खर्च येणार आहे. याबाबतची माहिती राष्ट्रीय महामार्गाचे प्रकल्प संचालक संजय कदम यांच्या माध्यमातून महामार्गाचे समन्वयक इंजिनिअर दिलीप मेदगे यांनी दिली.
