पुणे; पुढारी वृत्तसेवा : माओवादी संघटनेचा सक्रिय सदस्य असल्याच्या आरोपाखाली अटक करण्यात आलेल्या अरुण भेलके याला आठ वर्षे सक्तमजुरी आणि 42 हजार रुपये दंडाची शिक्षा विशेष न्यायाधीश ए. आर. नावंदर यांनी सुनावली. 2014 मध्ये अरुण भेलके ऊर्फ आदित्य पाटील आणि त्याची पत्नी कांचन ऊर्फ सोनाली पाटील (वय 33) यांना महाराष्ट्र दहशतवादी विरोधी पथकाने (एटीएस) चाकण येथून अटक केली होती. दोघांवर यूएपीए कायद्यांतर्गत कारवाई करण्यात आली होती. याबाबत 2014 मध्ये विविध कलमांनुसार गुन्हा दाखल करण्यात आला होता. त्यावेळीपासून भेलके हा येरवडा कारागृहात न्यायालयीन कोठडीत आहे. तर कांचनचा दीर्घ आजाराने ससून रुग्णालयात मृत्यू झाला.
अरुण आणि कांचन दोघेही चंद्रपूरचे आहेत. त्यांनी माओवादी संघटनेच्या आदेशानुसार मुंबई, पुणे या शहरांत काम करून येथील वस्त्यांमधील तरुणांना माओवादी चळवळीत ओढण्याचा प्रयत्न केल्याचा पोलिसांचा आरोप आहे. मुंबईत वास्तव्यास असताना अरुण भेलके हा एल्गार प्रकरणातील आरोपी सुधीर ढवळे यांच्या रिपब्लिकन पँथर्स संघटनेच्या काही कार्यकर्त्यांच्या संपर्कात होता. पुढे भेलके आणि कांचन यांनी आदित्य पाटील व सोनाली पाटील नावाने बनावट पॅन कार्ड मिळविल्याचे एटीएसच्या तपासात समोर आले होते.
न्यायालयात सांगितली होती कामाची पद्धत
माओवादी नेता दीपक ऊर्फ मिलिंद तेलतुंबडे सोबत भेलके हा माओवादी चळवळीत सक्रिय होता. शहरी भागात माओवादी चळवळ पसरविण्याचे काम अरुण व त्याची पत्नी करीत होती. जंगलात आपली तेलतुंबडेच्या उपस्थित भेट व चर्चा झाली आहे, अशी साक्ष शरणागती पत्करलेल्या नक्षलवादी कृष्णा दोरपटे याने न्यायालयासमोर दिली होती. दलित संघटनांना चळवळीत सहभागी होण्याकरिता प्रेरित करतो, असे त्याने सांगितले होते. त्याची काम करण्याची पद्धत त्याने न्यायालयास सांगितली होती. या खटल्याचे कामकाज सरकार पक्षाच्या वतीने अॅड. उज्ज्वला पवार यांनी पाहिले. तर अॅड. रोहन नहार यांनी आरोपीच्या वतीने बाजू मांडली.
