जेऊर फाटा रेल्वेगेट राहणार 36 तास बंद
वाल्हे; पुढारी वृत्तसेवा : जेऊर – नीरा मार्गावरील पिंपरे खुर्द हद्दीतील जेऊर फाटा येथील रेल्वे गेट मंगळवारी (दि.13) ते बुधवार (दि.14) सायंकाळी 7 वाजेपर्यंत (36 तास) वाहतुकीसाठी बंद राहणार असल्याची माहिती रेल्वे प्रशासनाने दिली आहे. पर्यायी मार्गाचा वापर करावा, असे सांगण्यात आले आहे. नीरा- जेऊर, मांडकी, वीर, सारोळा या मार्गावर मिरज- पुणे रेल्वे लाईनवरील जेऊर फाटा येथे रेल्वेचे 28 नंबर किलोमीटर 80 / 4-5 गेट आहे.
हे गेट रेल्वे मार्गाचे काम करण्यासाठी व निरीक्षणासाठी मंगळवार दि. 13 डिसेंबर रोजी सकाळी 07 ते बुधवार दि.14 डिसेंबर सायंकाळी 07 वाजेपर्यंत बंद राहणार असल्याची माहिती रेल्वेच्या जनसंपर्क अधिकार्‍यांनी मांडकी व जेऊर ग्रामपंचायतीला दिली आहे. यादरम्यान जेऊर, मांडकी, लपतळवाडी, वीर, सारोळा येथील नागरिकांनी वाहतुकीसाठी पर्यायी मार्गाचा वापर करावा, असे सांगण्यात आले आहे.
अतिवृष्टीनंतर प्रशासनाच्या निर्णयाचा फटका
मांडकी, जेऊर, लपतळवाडी , वीर ते सारोळा या ऊस बागायत पट्ट्यातून श्री सोमेश्वर सहकारी साखर कारखान्याकडे ऊस वाहतूक मोठ्या प्रमाणावर सुरू आहे. आगोदरच अतिवृष्टीमुळे शेत जमिनिला वाफसा लवकर न आल्याने व ऊसतोडणी कामगार कमी आल्याने, कारखान्याचा गळीत हंगाम संथ गतीने सुरु आहे. ऊसतोडणीही लांबल्या आहेत. यातच आता सलग 36 तास वाहतूक बंद राहिल्याने या परिसरातील शेतकर्‍यांचे नुकसान होणार आहे.
