पुणे; पुढारी वृत्तसेवा : जय भवानी, जय शिवाजी… छत्रपती शिवाजी महाराजांच्या नामघोषात किल्ले राजगडावरील पाली दरवाजातून छत्रपती शिवाजी महाराजांची मूर्ती विराजमान झालेल्या पालखीने गडावर प्रवेश केला आणि एकच जल्लोष झाला. पुष्पवृष्टी आणि तुतारीच्या सलामीने किल्ले राजगडाचा परिसर दुमदुमून गेला. औरंगजेबाच्या हातावर तुरी देऊन शिवरायांनी स्वत: सहकार्यांची आग्य्राहून सुटका करून राजगडावर पोहोचण्याच्या घटनेला 356 वर्षे पूर्ण होत असल्याबद्दल हा आनंदोत्सव गडावर साजरा करण्यात आला.
पुणे महानगरपालिका आणि श्री शिवाजी राजगड स्मारक मंडळ, पुणे यांच्या संयुक्त विद्यमाने 356 वा आग्य्राहून सुटका स्मृतिदिनानिमित्त किल्ले राजगड उत्सवाचे आयोजन केले होते. या वेळी युवराज शहाजी राजे छत्रपती, श्री शिवाजी राजगड स्मारक मंडळाचे संस्थापक वसंतराव प्रसादे, गडकरी असलेले सूर्यकांत भोसले, डॉ. राजेंद्र हिरेमठ, मिलिंद लिमये, सुरेश परदेशी, आशिष पाळंदे, व्याख्याते योगेश पाटील, तसेच पुणे महानगरपालिकेचे अधिकारी, शिवप्रेमी उपस्थित होते.
युवराज शहाजी राजे छत्रपती म्हणाले, 'गड संवर्धनासाठी सर्वांनी एकत्र येण्याची गरज आहे. सर्वांनी आपले किल्ले, आपला इतिहास जगाच्या पटलावर पोहोचवूया. नवीन संकल्पना आपण राबवूया.' वंशपरंपरेनुसार गडकरी असलेले सूर्यकांत भोसले यांच्या हस्ते सूर्योदयावेळी ध्वजारोहण झाले. त्यानंतर पाली दरवाजा ते महाराजांच्या सदरेपर्यंत पालखी मिरवणूक सोहळ्याचे आयोजन केले होते. यामध्ये पारंपरिक वेशात उपस्थितांनी सहभाग घेतला.
आनंदोत्सवाच्या पूर्वसंध्येला राजगड पायथ्याच्या येथील पाली गावात गडजागरणाचा कार्यक्रम झाला. राजगड पायथ्याला ढोल-ताशांच्या गजरात छत्रपती शिवाजी महाराजांच्या प्रतिमेस पुष्पहार अर्पण करण्यात आला. सरसेनापती येसाजी कंक यांच्या वंशजांचा मानपत्र देऊन सन्मान करण्यात आला.
