जेजुरी; पुढारी वृत्तसेवा : जेजुरी पोलिस ठाणे हद्दीतील मावडी क.प. येथे दि. 28 नोव्हेंबर रोजी मध्यरात्री दोन वाजेच्या सुमारास कोयत्याने मारहाण करून तिघे जण घरफोडी करून पळून गेले होते. या तिघांना स्थानिक गुन्हे शाखेने जेरबंद केले आहे. सचिन चंद्रकांत भोसले (वय 28), नितीन किशोर काळे (वय 25, दोघेही रा. खरातवाडी, ता. श्रीगोंदा), तसेच कृष्ण शेतकरी काळे (वय 45, रा. टाकळी तांदळी, ता. श्रीगोंदा) अशी जेरबंद करण्यात आलेल्या तिघांची नावे आहेत.
याबाबत स्थानिक गुन्हे शाखेने दिलेली माहिती अशी की, जेजुरी पोलिस ठाणे हद्दीतील मावडी कडेपठार येथे दि. 28 नोव्हेंबर रोजी तिघा चोरट्यांनी बबन रामभाऊ भामे यांच्या घराची कडी-कोयंडा उचकटून घरात प्रवेश केला. या वेळी आवाज झाल्याने बबन भामे यांनी चोरट्यांना विरोध केला. तेव्हा एका चोरट्याने त्यांच्या डोक्यात कोयत्याने वार केला, तर दुसर्या चोरट्यांनी त्यांच्या कपाटातील दोन हजार रुपये व कागदपत्रे घेऊन ते पळून गेले होते.
पुणे ग्रामीण पोलिस अधीक्षक अंकित गोयल, अप्पर पोलिस अधीक्षक आनंद भोईटे, पोलिस उपअधीक्षक धनंजय पाटील, स्थानिक गुन्हे शाखेचे वरिष्ठ पोलिस निरीक्षक अविनाश शिळीमकर यांच्या मार्गदर्शनाखाली या चोरट्यांना पकडण्यासाठी तातडीने पथक नेमण्यात आले.
या पथकातील पोलिस उपनिरीक्षक शिवाजी ननवरे, गणेश जगदाळे, पोलिस हवालदार जनार्दन शेळके, विजय कांचन, अमोल शेंडगे, धीरज जाधव, दगडू वीरकर यांनी श्रीगोंदा तालुक्यातील खरातवाडी येथे सापळा रचून तिघा आरोपींना 24 तासांत जेरबंद केले. या तिघा आरोपींवर वेगवेगळ्या पोलिस ठाण्यात गुन्हे दाखल आहेत.
