पिंपरी : पुढारी वृत्तसेवा : पिंपरी-चिंचवड महापालिकेचे अग्निशमन विभागाच्या नऊ कर्मचार्यांच्या मोशी उपअग्निशमन केंद्रात नियमबाह्य पद्धतीने नेमणुका करण्यात आल्या आहेत. मर्जीतील कर्मचार्यांना त्या ठिकाणी बदली देण्यात आली असल्याचा आरोप इतर पात्र कर्मचार्यांतून केला जात आहे. या प्रकाराबद्दल कर्मचार्यांमध्ये नाराजीचा सूर आहे. अग्निशमन विभागाचे काम अत्यंत तातडीचे व जोखमीचे असते. कोणती घटना कधी घडेल हे सांगता येत नाही. त्यामुळे केंद्राच्या जवळच्या अंतरावर राहत असलेल्या कर्मचार्यांची त्या ठिकाणी नियुक्ती करण्याचा नियम आहे.
नियुक्तीचा नियम तसेच, पात्र कर्मचार्यांना डावलून आपल्या मर्जीतील व ठराविक कर्मचार्यांना मोशी केंद्रावर नियुक्त केले आहे. ते कर्मचारी केंद्रापासून दूर अंतरावर राहतात. तसेच, मोशी केंद्र अद्याप सुरू झालेले नाही. असे असताना घाईघाईत मुख्य अग्निशमन अधिकारी गावडे यांनी सेवानिवृत्तीच्या अखेरच्या दिवशी या नियुक्तीच्या आदेशावर सही केली आहे. या नियमबाह्य नेमणुकांची आयुक्तांनी चौकशी करून तो आदेश रद्द करावा, अशी अपेक्षा कर्मचार्यांकडून व्यक्त केली जात आहे.
