पिंपरी : पुढारी वृत्तसेवा : 'श्रीमंत' समजल्या जाणार्या पिंपरी-चिंचवड महापालिकेतील तब्बल 7 हजार 84 अधिकारी व कर्मचार्यांची दिवाळी गोड होणार आहे. दिवाळीसाठी 8.33 टक्के बोनस व 20 हजार रुपये सानुग्रह अनुदान दिले जाणार आहे. ती एकूण रक्कम तब्बल 60 कोटी इतकी आहे. कर्मचार्यांबरोबरच शिक्षक व बालवाडी शिक्षकांना देखील हा लाभ दिला जाणार आहे. महापालिका आयुक्त शेखर सिंह यांनी बोनस व सानुग्रह अनुदानाबाबत गुरुवारी (दि.6) आदेश काढला आहे.
औद्योगिक कायद्यानुसार पिंपरी-चिंचवड महापालिका कर्मचारी महासंघ व महापालिका यांच्यात सन 2020-21 मध्ये अधिकारी, कर्मचार्यांना 8.33 टक्के बोनस व 20 हजार रुपये सानुग्रह अनुदान देण्याबाबत 5 वर्षांचा करार झाला आहे. त्यानुसार, हा बोनस दरवर्षी दिला जातो. महापालिका आस्थापनेवर सुमारे सात हजार 84 अधिकारी व कर्मचारी कार्यरत आहेत. तर बालवाडी, प्राथमिक व माध्यमिक शिक्षकांची संख्या सुमारे दीड हजार आहे. पालिकेतील सर्व वर्ग 1 ते 4 मधील अधिकारी व कर्मचार्यांना तसेच, रजा राखीव वैद्यकीय अधिकारी व रजा राखीव परिचारिकांना 8.33 टक्के प्रथा बोनस व 20 हजार रुपये सानुग्रह अनुदान देण्यात येणार आहे.
याचा लाभ पालिकेत मानधन तत्त्वावर काम करणार्या वैद्यकीय अधिकारी, राखीव नर्सेस, शिक्षण विभागातील अधिकारी, कर्मचारी, समूहसंघटक यांना होणार आहे.बोनस व सानुग्रह अनुदानाची रक्कम सर्व कर्मचार्यांना दिवाळीपूर्वी मिळेल याची दक्षता घ्यावी. त्याबाबतची बिले तयार करून तातडीने लेखा विभागाकडे सादर करावीत, असे आदेश आयुक्त सिंह यांनी विभागप्रमुखांना दिले आहेत.
