पुणे : जिल्ह्यात ९५ जणांना नव्याने करोना संसर्ग
पुणे, पुढारी वृत्तसेवा: मंगळवार ४ ऑगस्ट रोजी दिवसभरात पुणे जिल्ह्यातील ९५ जणांना करोना संसर्गाचे निदान झाले. साथरोग सर्वेक्षण विभागाने याबाबत माहिती दिली आहे. मात्र, करोनाची लागण झालेल्या बहुसंख्य रुग्णांना सौम्य प्रकारची लक्षणे असून ते घरीच बरे होत असल्याने घाबरून जाण्याचे कोणतेही कारण नसल्याचे सार्वजनिक आरोग्य विभागाकडून स्पष्ट करण्यात आले आहे.
४ ऑगस्ट रोजी दिवसभरात आढळलेल्या ९५ नवीन रुग्णांपैकी ५९ रुग्ण हे पुणे महापालिका क्षेत्रातील आहेत. २७ रुग्ण पिंपरी-चिंचवड महापालिका क्षेत्रात, तर नऊ रुग्ण जिल्ह्याच्या उर्वरित भागात आढळले आहेत. तसेच पुणे महापालिका क्षेत्रातील एका रुग्णाचा करोनाने मृत्यू झाला आहे. कोरोना संसर्गाचा प्रसार रोखण्यासाठी विशेषत: जोखीम गटातील रुग्ण, सहव्याधीग्रस्त आणि ज्येष्ठ नागरिकांनी तसेच लसीकरण न झालेल्या नागरिकांनी मास्क वापरासह सर्व आवश्यक खबरदारी घेण्याचे आवाहन प्रशासनाकडून करण्यात येत आहे. या ९५ नव्या रुग्णांमुळे पुणे जिल्ह्यातील एकूण करोना रुग्णसंख्या १५ लाख दोन हजार १९९ एवढी झाली आहे.
