येरवडा (पुणे), पुढारी वृत्तसेवा: दुचाकींना डुप्लिकेट सायलेन्सर लावून कर्ण कर्कश आवाज करत ध्वनी प्रदूषण करणाऱ्यांना वाहतूक पोलिसांच्या कारवाईला सामोरे जावे लागणार आहे. येरवडा वाहतूक विभागाच्या पोलिसांनी 12 बुलेट चालकांवर याप्रकरणी कारवाई केली. या दुचाकींचे डुप्लिकेट सायलन्सर जप्त करून संबंधितांना दंड केला. त्यानंतर दुचाकी चालकांनी मूळ सायलेंसर बसविल्यानंतर या दुचाकी सोडण्यात आल्याची माहिती पोलिस निरीक्षक जयराम पायगुडे यांनी दिली.
पोलीस आयुक्तांच्या आदेशानुसार गाडीला डुप्लिकेट सायलेन्सर लावुन कर्ण कर्कश आवाज करणाऱ्यावर कारवाई करण्याचे आदेश वाहतूक विभागाने पोलिसांना दिले आहेत. त्यानुसार बुलेटचालकांवर ही कारवाई करण्यात आली आहे. बुलेटला दुसरे सायलन्सर लावुन फटाक्‍यासारखा आवाज करणाऱ्या 12 चालकांवर पोलिसांनी कारवाई केली. या बुलेटचे सायलन्सर काढुन ते जप्त केले आणि वाहनचालकांवर दंडात्मक कारवाई करण्यात आली. त्यानंतर मूळ सायलेन्सर बसविण्यात आल्यानंतर या गाड्या सोडण्यात आल्या. बेशिस्त वाहनचालकांवर कारवाई सुरू राहणार असल्याचे पायगुडे यांनी सांगितले
