मुंबई/ पुणे; पुढारी वृत्तसेवा: 'भारताची अर्थव्यवस्था मजबूत असल्याने जगभरातील देश भारतात येऊ इच्छितात. 'महाराष्ट्र चेंबर ऑफ कॉमर्स' ने अमेरिकेत व्यापार परिषदेचे आयोजन करून महाराष्ट्राला ज्या पध्दतीने सादर केले आहे ते पाहता महाराष्ट्र व अमेरिकेदरम्यान गुंतवणुकीच्या नवीन संधी खुल्या होतील,' असा विश्वास भारताचे न्यूयॉर्कमधील कॉन्सूलेट जनरल रणधीर जायस्वाल यांनी व्यक्त केला.
'महाराष्ट्र चेंबर ऑफ कॉमर्स, इंडस्ट्री अँड अॅग्रीकल्चर' व बृहन्महाराष्ट्र मंडळ अमेरिका यांच्या संयुक्त विद्यमाने अमेरिकेतील अटलांटिक सिटी, न्यू जर्सी येथे बिझनेस समिटचे आयोजन करण्यात आले होते. या समीटच्या उद्घाटनप्रसंगी जायस्वाल बोलत होते.
महाराष्ट्र चेंबर ऑफ कॉमर्सचे अध्यक्ष ललित गांधी यांच्या अध्यक्षतेखाली झालेल्या परिषदेत बृहन्महाराष्ट्र मंडळच्या अध्यक्षा विद्या जोशी, बिझनेस समिटचे निमंत्रक आनंद चौथाई, नारीशक्ती पुरस्कार विजेत्या श्रीमती रूमादेवी, पर्सिस्टंट कंपनीचे प्रमुख आनंद देशपांडे, विकास बावधनकर, नरेन गोडसे, नवीन पाठक, चेंबरचे वरिष्ठ उपाध्यक्ष उमेश दाशरथी व्यासपीठावर उपस्थित होते. 'बृहन्महाराष्ट्र मंडळाच्या अध्यक्ष विद्या जोशी यांनी बिझनेस समीटचे आयोजन हा महत्त्वपूर्ण निर्णय असून भविष्यात या उपक्रमामुळे महाराष्ट्राशी आमचे ॠणानुबंध अजुनही दृढ होतील,' असा विश्वास व्यक्त केला.
बिझनेस समीटचे निमंत्रक आनंद चौथाई म्हणाले, 'मंडळाने या आयोजनासाठी केलेल्या आवाहनास महाराष्ट्र चेंबरने सकारात्मक प्रतिसाद देऊन हे आयोजन यशस्वी केले. याचा अमेरीकेतील महाराष्ट्रीयन समुहास अभिमान आहे.'महाराष्ट्र चेंबरचे अध्यक्ष ललित गांधी यांनी अध्यक्षीय भाषणात महाराष्ट्राच्या औद्योगिक विकासातील महाराष्ट्र चेंबरच्या योगदानाची माहिती देऊन महाराष्ट्र हे भारतातील आघाडीचे औद्योगिक राज्य असून गुंतवणुकीसाठी पोषक वातावरण व उत्तम बाजारपेठ, कुशल मनुष्यबळ उपलब्ध असणारे राज्य असून व्यापारात संयुक्त उपक्रमांसाठी व नवीन गुंतवणुकीसाठी महाराष्ट्र सर्वात उत्तम पर्याय असल्याचे आग्रहपूर्वक नमूद केले.
चेंबरचे वरिष्ठ उपाध्यक्ष उमेश दाशरथी यांनी महाराष्ट्राचे विभागवार वैशिष्ट्यासह प्रभावी सादरीकरण केले. पर्सिस्टंटचे आनंद देशपांडे, रूमादेवी यांनीही शुभेच्छा व्यक्त केल्या. कॉन्सुलेट जनरल रणधीर जायस्वाल यांनी महाराष्ट्रात नवीन गुंतवणुकीसाठी तसेच महाराष्ट्र चेंबरतर्फे येणार्या प्रस्तावांच्या स्वीकृतीसाठी सहकार्य करण्याची ग्वाही दिली.
महाराष्ट्र चेंबरतर्फे जगभरातील विविध देशात राहणार्या महाराष्ट्रीयन लोकांच्या संघटनांचे एक सामूहिक व्यासपीठ 'ग्लोबल महाराष्ट्र फोरम' या नावाने गठीत केल्याची घोषणा ललित गांधी यांनी केली. या फोरमचे औपचारिक 'उद्घाटन' कॉन्सुलेट जनरल रणधीर जायस्वाल यांच्या हस्ते करण्यात आले. याप्रसंगी दीपक शिकापूर, प्रवीण पाटील, शेखर चिटणीस, विनित पोळ, नितिन इंगळे, श्वेता इनामदार, प्रज्ञा पोंक्षे, भाऊसाहेब कालवाघे, रविराज अहिरराव, संजीव तांभोरकर यांनी बैठकांमध्ये सहभाग घेतला.
आतापर्यंत अमेरिकेत सांस्कृतिक संमेलन होत होती. मात्र, महाराष्ट्र चेंबर ऑफ कॉमर्स अँड अॅग्रीकल्चरने सुचवले की, उद्योजकांची परिषद देखील घ्यावी. त्यानुसार पहिल्यांदा अमेरिकेत उद्योजकांची परिषद झाली. या परिषदेत महाराष्ट्रातून 18 उद्योजक सहभागी झाले होते.
– उमेश दाशरथी
उपाध्यक्ष महाराष्ट्र चेंबर ऑफ कॉमर्स अँड अॅग्रीकल्चर.
