पुणे; पुढारी वृत्तसेवा: सावित्रीबाई फुले पुणे विद्यापीठाच्या विद्यापीठ अधिकार मंडळाने शैक्षणिक वर्ष 2021-22 च्या उन्हाळी सत्राच्या सर्व विद्या शाखांच्या परीक्षांसाठी कम्बाईन पासिंगचा निर्णय घेतला आहे. या परीक्षेत लेखी तसेच तोंडी किंवा प्रात्यक्षिक अशा दोन्ही परीक्षांना विद्यार्थ्यांनी हजर असणे अनिवार्य आहे, असे सावित्रीबाई फुले पुणे विद्यापीठाने परिपत्रक काढत स्पष्ट केले आहे.
कोरोनाच्या पार्श्वभूमीवर विशेष बाब म्हणून केवळ शैक्षणिक वर्ष 2021-22 साठी एकत्रित गुणांकनाचा (कम्बाईन पासिंग) निर्णय घेण्यात आला आहे. या वर्षातील परीक्षेचे शीर्ष म्हणजेच मौखिक, प्रात्यक्षिक, अंतर्गत आणि लेखी परीक्षांचे गुण वेगवेगळे न धरता एकत्रितरित्या ग्राह्य धरून त्याप्रमाणे निकाल घोषित करण्यास मान्यता देण्यात आली आहे. मात्र, लागू असलेल्या परीक्षेपैकी कोणत्याही परीक्षेस विद्यार्थी अनुपस्थित राहिल्यास अशा विद्यार्थ्यांना हा निर्णय लागू राहणार नसल्याचेही विद्यापीठाने स्पष्ट केले आहे.
