लोणावळा : पुढारी वृत्तसेवा : लोणावळ्यातील कुमार चौक ते मावळा पुतळा चौक दरम्यान फुगे विकणारी लहान मुले व महिला यांनी अक्षरशः दुकानदार, पर्यटक व वाहनचालक यांना हैराण केले आहे. फुगे विकायच्या नावाखाली वाहनांवर हात मारत भीक मागायची, गाड्याच्या मागे पळायचे, पर्यटक काही वस्तू घेत असतील तर त्यांच्या मागे लागायचे, हातातील वस्तू ओढायचे असे प्रकार सुरू आहेत. या फुगेवाल्यांनी लोणावळा शहरात राहण्यासाठी सध्या कुमार रिसॉर्टच्या इमारतीत असलेल्या दुकांनासमोरील जागा निवडली आहे. रात्रभर त्यांचा आरडाओरडा सुरू असतो.
हा परिसर त्यांनी अस्वच्छ केला आहे. अंगावरील कपडे व अंथरूण तेथेच टाकायचे, खरकटे अन्न, पुठ्ठे सर्वत्र पडलेले असल्याने परिसरात दुर्गंधी पसरली आहे. शहराचे प्रवेशद्वार असलेल्या चौकातच हे चित्र असल्याचे शहर स्वच्छतेच्या कामास गालबोट लागत आहे. फुगे हातात घेऊन रस्त्याने फिरणारी ही मुले व महिला यांमुळे पर्यटकांसह स्थानिक नागरिक देखील हैराण झाले आहेत. ही मुले पर्यटकांच्या मागे पळत सुटतात. त्यांच्याकडील वस्तू विकत न घेतल्यास वाहनांच्या काचांवर जोरजोराने हाताने मारतात. गाडीची काच उघडी असल्यास त्यातून हात घालत संबंधितांना त्रास देतात.
मागील काळात माजी नगराध्यक्षा सुरेखा जाधव, तत्कालीन मुख्याधिकारी सचिन पवार व त्यानंतर रवी पवार तसेच पोलिस निरीक्षक मनोज यादव यांनी या सर्वांचा बंदोबस्त करत त्यांना त्यांच्या गावाकडे पाठवून दिले होते; आता मात्र त्यांची फौज पुन्हा शहरात दाखल झाली आहे. मुले व महिलांना भीक मागायला लावत पुरुष मंडळी आलेल्या पैशातून दारु व अन्य नशा करत भांडताना दिसतात.
अनेकवेळा एकमेकावर दगडफेक करण्यापर्यंत त्यांची मजल जाते. तसेच हातांनी अथवा काठ्यांनी एकमेकाला मारत भांडण करत असल्याचे चित्र पहायला मिळत आहे. लोणावळा नगरपरिषदेने व लोणावळा शहर पोलिसांनी या फुगेवाल्यांचा बंदोबस्त करत कुमार
चौकातून ये-जा करणार्या नागरिकांना तसेच वाहन चालकांना तसेच पर्यटकांना दिलासा द्यावा, अशी मागणी या भागातील दुकानदार व नागरिक करत आहेत.
