पुणे : पुढारी वृत्तसेवा : केंद्र सरकारच्या प्रधानमंत्री कृषी सिंचन योजनेतील लाभार्थ्यांना राज्य सरकारकडून मुख्यमंत्री शाश्वत कृषी सिंचन योजनेतून पूरक अनुदान देण्यात येते. त्यासाठी आणि वैयक्तिक शेततळे योजनेसाठी मिळून राज्य सरकारने 168 कोटींचे अनुदान कृषी विभागास उपलब्ध करून दिले आहे. प्रधानमंत्री कृषी सिंचन योजनेंतर्गत राज्यातील अल्प व अत्यल्प भू-धारक शेतकर्यांना 55 टक्के आणि इतर शेतकर्यांना पाच हेक्टरच्या मर्यादेत 45 टक्के अनुदान देण्यात येते.
या अनुदानाशिवाय राज्याकडून मुख्यमंत्री शाश्वत कृषि सिंचन योजनेंतर्गत अल्प व अत्यल्प भू-धारक शेतकर्यांना 25 टक्के आणि इतर शेतकर्यांना 30 टक्के पूरक अनुदान देऊन सूक्ष्म सिंचनासाठी अनुक्रमे 80 टक्के व 75 टक्के एकूण अनुदान देण्यात येते. त्याशिवाय 29 जून 2022 च्या शासन निर्णयान्वये मुख्यमंत्री शाश्वत कृषी सिंचन योजनेत वैयक्तिक शेततळे या बाबीचा समावेश करण्यात आल्याची माहिती फलोत्पादन संचालक कैलास मोते यांनी दिली.
