ज्ञानेश्वर बिजले, पुणे: पुण्याच्या सार्वजनिक वाहतूक व्यवस्थेत महत्त्वाची भूमिका बजावणार्या मेट्रो प्रकल्पाला नव्या राज्य सरकारच्या कार्यकाळात वेगाने चालना मिळणार आहे. दोन्ही महानगरांतील रहिवाशांची अपेक्षा असलेले स्वारगेट ते कात्रज भुयारी मार्ग आणि पिंपरी ते निगडी उन्नतमार्ग यांना केंद्राची तातडीने मंजुरी मिळण्याची शक्यता आहे. भाजप-शिवसेना युती सरकार असताना महापालिकेच्या गेल्या निवडणुकीच्या पूर्वी पुणे व पिंपरी-चिंचवडमधील मेट्रो प्रकल्प हाती घेण्यात आला. पंतप्रधान नरेंद्र मोदी यांनी भूमिपूजन केले. गेल्या मार्चमध्ये मोदी यांनीच मेट्रोला हिरवा झेंडा दाखविला. कोथरूडला आणि पिंपरीला मेट्रो धावू लागली.
या वर्षअखेरपर्यंत उन्नतमार्गावरील मेट्रोचा विस्तार होईल. वर्षभरात भुयारी मार्गातूनही मेट्रो धावू लागेल. मेट्रोचे श्रेय भाजपकडे जाते. विशेषतः तत्कालीन मुख्यमंत्री देवेंद्र फडणवीस यांनी मेट्रोचा चांगला पाठपुरावा केला. माजी उपमुख्यमंत्री अजित पवार यांनीही मेट्रोसाठी पुरेसा निधी देताना अन्य 82 किलोमीटर मार्गावर मेट्रोचा विस्तार करण्यासाठी विस्तृत प्रकल्प आराखडा करण्यास राज्य सरकारची मान्यता दिली. पिंपरी चिंचवड महापालिका भवन ते निगडी दरम्यान उन्नत मार्ग, तसेच स्वारगेट ते कात्रजदरम्यान भुयारी मार्ग करण्यात राज्य सरकारची मान्यता देत ते प्रस्ताव केंद्र सरकारकडे मान्यतेसाठी पाठविले.
राज्यात आता मुख्यमंत्री एकनाथ शिंदे यांच्या नेतृत्वाखाली आलेल्या राज्य सरकारमध्ये फडणवीस उपमुख्यमंत्री आहेत. आगामी महापालिका निवडणुकीच्या पार्श्वभूमीवर फडणवीस निश्चितपणे पुण्यातील मेट्रोला चालना देतील, अशी अपेक्षा आहे. पिंपरी-चिंचवड महापालिकेने पिंपरी- निगडी मेट्रोसाठी प्रथमपासून आग्रह धरला होता. हा प्रस्ताव केंद्रीय मंत्रिमंडळासमोर मान्यतेसाठी गेले दहा महिने प्रलंबित आहे. त्यापाठोपाठ पुणे महापालिकेने पाठविलेला स्वारगेट-कात्रज भुयारी मार्गाचा प्रस्तावही राज्य सरकारच्या मान्यतेनंतर केंद्र सरकारकडे अंतिम मान्यतेसाठी सादर करण्यात आला आहे.
नवीन सरकारमुळे हे दोन्ही प्रस्ताव लवकर मार्गी लागण्याची दाट शक्यता आहे. स्वारगेट ते कात्रजदरम्यान साडेपाच किलोमीटरचा भुयारी मेट्रो मार्ग, पिंपरी ते निगडी यादरम्यान 4.4 किलोमीटर उन्नतमार्ग होणार आहे. हे दोन्ही प्रस्ताव मेट्रोच्या पहिल्या टप्प्याचा विस्तारीत भाग म्हणून संबोधण्यात आले आहेत. केंद्र सरकारची त्याला मान्यता मिळाल्यावर, प्रकल्पासाठी परदेशी निधी कर्जाने मिळणार असल्याचे त्याचा करार होईल. त्यानंतर निविदा काढल्या जातील. केंद्राने दोन्ही प्रस्ताव लवकर मान्य केल्यास, वर्षभरात प्रत्यक्ष कामाला प्रारंभ होऊ शकेल. त्यामुळे, नवीन सरकार हे प्रस्ताव मंजूर करून घेण्यासाठी वेगाने पाठपुरावा करण्याची शक्यता आहे. (क्रमशः)
वर्षभरात 33 किमी धावणार
पंतप्रधान नरेंद्र मोदी यांनी उद्घाटन केल्यानंतर, पौडरस्ता व कर्वेरस्ता, तसेच पिंपरी-फुगेवाडीदरम्यान बारा किलोमीटर मार्गावर मेट्रो धावू लागली. या डिसेंबरपर्यंत मेट्रो स्थानकांची कामे होतील, तशी मेट्रो उन्नतमार्गावरून पुढे धावू लागेल. पुढील वर्षभरात मेट्रो 33 किलोमीटर मार्गावरून धावू लागेल. त्यानंतर येत्या दोन वर्षांत पुणेकरांच्या सेवेला हिंजवडी ते शिवाजीनगर हा 23 किलोमीटर लांबीचा तिसरा मेट्रो मार्ग उपलब्ध होईल. त्याचवेळी दोन प्रस्ताव मंजूर झाल्यास, स्वारगेट ते पिंपरी या मार्गाच्या आणखी दहा किलोमीटरच्या विस्ताराचे काम सुरू होईल. त्यादरम्यान पुणे व पिंपरी-चिंचवडमध्ये आणखी शंभर किलोमीटर मार्गांवर मेट्रोच्या दुसर्या टप्प्याचा आराखडा तयार होईल. त्या कामाला चालना मिळेल.
