मे महिन्यात पुण्यातून सर्वाधिक प्रवाशांचे ‘उड्डाण’; तब्बल 6 लाख 69 हजार प्रवाशांनी केला प्रवास

By:Amruta Chougule Published on: June 21, 2022, 1:02 PM

पुणे : पुढारी वृत्तसेवा: पुणे विमानतळावरून गेल्या पाच महिन्यांत सर्वाधिक प्रवाशांनी प्रवास ’मे’ महिन्यात केल्याचे समोर आले आहे. ’मे’ महिन्यामध्ये पुणे विमानतळावरून तब्बल 6 लाख 69 हजार 464 प्रवाशांनी प्रवास केला आहे. येत्या काळात पुण्यातून देशभरात प्रवास करणार्‍यांची संख्या वाढण्याची शक्यता आहे, असा विश्वास विमानतळ प्रशासनाकडून व्यक्त करण्यात आला आहे.कोरोनामुळे विमान प्रवाशांची संख्या अक्षरश: घटली होती.

ती आता हळू-हळू वाढत असून, विमानसेवेला चांगला प्रतिसाद मिळत आहे. विमानतळावरून प्रवास करणार्‍या प्रवाशांची संख्या जानेवारी 2022 पासून वाढण्यास सुरुवात झाली. या महिन्यात सव्वा तीन लाख प्रवाशांनी प्रवास केला होता. ती संख्या प्रत्येक महिन्यात वाढत राहिली आहे. फेब्रुवारी, मार्च, एप्रिल आणि आता मे महिन्यात ही संख्या 6 लाख 69 हजार लाखांच्या घरात पोहोचली आहे, अशी माहिती विमानतळ प्राधिकरणाने दिली.