GBS virus
बारामती : बारामती शहरातील कसबा परिसरातील एका १५ वर्षीय युवकास 'जीबीएस' आजाराची लागण झाली आहे. त्याला शुक्रवारी (दि.२५) पुणे शहरात उपचारासाठी दाखल करण्यात आले. अतिदक्षता विभागात त्याच्यावर उपचार सुरु आहेत.
सध्या बारामती तालुक्यात यात्रा-जत्रा सुरु आहेत. या युवकाचे ग्रामीण भागातील जत्रांमधून फिरणे झाले होते. त्या ठिकाणी त्याने काही पदार्थ खाल्ले होते, अशी माहिती संबंधित युवकाच्या कुटुंबियांनी दिल्याचे उपजिल्हा रुग्णालयाचे वैद्यकीय अधिक्षक डॉ. महेश जगताप यांनी सांगितले. याबाबत सिल्व्हर ज्युबिली रुग्णालयाचे वैद्यकीय अधीक्षक डॉ. महेश जगताप यांनी सांगितले की, कसब्यातील १५ वर्षीय मुलाला गुरुवारी (दि. २४) सकाळी अशक्तपणा जाणवू लागला. शिवाय त्याला उठता येत नव्हते. त्याला घेवून त्याचे पालक कसबा येथील खासगी डॉक्टरांकडे गेले. तपासणीनंतर पुढील उपचारासाठी या मुलाला भाग्यजय हाॅस्पिटलच्या डॉ. आर. डी. वाबळे यांच्याकडे दाखल करण्यात आले.
या ठिकाणी मेंदूविकार तज्ज्ञ डॉ. सुयोग दोशी यांनी हा मुलगा संशयित 'जीबीएस' रुग्ण असल्याने त्याला उपचारासाठी पुण्याला पाठविले. त्याच्यावर पुणे शहरातील काशीबाई नवले हॉस्पिटलमध्ये अतिदक्षता विभागात उपचार सुरु असून कृत्रिम श्वसन यंत्रणेवर त्याला ठेवण्यात आले आहे. याबाबत तालुका आरोग्य अधिकारी डॉ. मनोज खोमणे यांच्याशी चर्चा झाली आहे. हा मुलगा वास्तव्यास असलेल्या परिसराचे तातडीने सर्व्हेक्षण करुन संशयित रुग्णांची उपजिल्हा रुग्णालयात तपासणी केली जाईल. लक्षणे आढळल्यास उपचार करण्यात येतील. गंभीर रुग्ण आढळल्यास पुणे शहरात उपचारास पाठविण्याची शिफारस करण्यात येईल. या मुलाचे वडील दिव्यांग शेतकरी आहेत. सध्या त्यांना मुलाच्या उपचारासाठी आर्थिक मदतीची गरज आहे. या रुग्णाची 'हिस्ट्री' तपासणार असल्याचे आरोग्य विभागाच्या वतीने सांगण्यात आले.
