पिंपरी : उपयोगकर्ता शुल्कातून पालिका तिजोरीत 14 कोटी जमा

पिंपरी (पुणे); पुढारी वृत्तसेवा : पिंपरी-चिंचवड महापालिकेच्या वतीने कचरा गोळा केला म्हणून प्रत्येक घरातून दरमहा 60 रूपये शुल्क मिळकतकर बिलातून जमा केले जात आहे. आतापर्यंत 1 लाख 12 हजार नागरिकांनीं या शुल्कापोटी तब्बल 14 कोटी 20 लाख रूपये पालिका तिजोरीत जमा केले आहेत. केंद्र व राज्य सरकारने कचरा गोळा करण्यासाठी नागरिकांकडून पालिकेने शुल्क घ्यावा असा नियम केला आहे.

त्या नियमास पालिकेच्या सर्वसाधारण सभेने 20 ऑक्टोबर 2021 ला मंजुरी देऊन उपयोगकर्ता शुल्क वसुल करण्यास प्रशासनाला परवानगी दिली आहे. त्यानुसार 1 एप्रिल 2023 पासून प्रत्येक घरातून दरमहा 60 रूपये आणि बिगरनिवासी मिळकतधारकांकडून मिळकतीच्या आकारमानानुसार शुल्क वसुल केले जात आहे. हे वर्षभराचे शुल्क सन 2023-24 च्या मिळकतकर बिलात समाविष्ट करण्यात आले आहे.

या उपयोगकर्ता शुल्काची वसुली दरमहा न करता वार्षिक केली जात आहे. त्यामुळे निवासी मिळकतधारकांना वर्षाला 720 रूपयांचा आर्थिक भुर्दड सहन करावा लागत आहे. तर, हे शुल्क सन 1 एप्रिल 2019 पासून वसुल केले जात आहे. एका मिळकतकर बिलात दोन वर्षांचे शुल्क मिळकतधारकांच्या माथी मारले जात आहे. म्हणजे निवासी मिळकतधारकांना तब्बल 1 हजार 440 रूपयांचा अतिरिक्त आर्थिक भुर्दंड पडत आहे. आतापर्यंत एकूण 1 लाख 12 हजार मिळकतधारकांनी मिळकतकराचे बिल भरले आहे. त्यातील तब्बल 14 कोटी 12 लाख रूपये ही उपयोगकर्ता शुल्काची रक्कम आहे.

पालिकेकडे सुमारे 6 लाख निवासी व बिगरनिवासी मिळकतीची नोंद आहे. उपयोगकर्ता शुल्क वसुलीला सत्ताधार्यांसह विरोधकांनी तीव्र विरोध केला आहे. तरीही, उपयोगकर्ता शुल्क लागू करण्यात आला आहे. शुल्क वसुलीमुळे वित्त आयोगाचे पालिकेस अनुदान मिळणार 15 व्या वित्त आयोगामध्ये जे अनुदान मिळणार आहे, त्यांच्यासाठी उपयोग कर्ता शुल्काचा निकष आहे. या शुल्काच्या वसुलीच्या प्रमाणामध्ये 15 व्या वित्त आयोगाचे अनुदान महापालिकेला मिळणार आहे. त्यामुळे आता महापालिकेला 15 व्या वित्त आयोगाचे भरघोस अनुदान मिळू शकेल, असा दावा पालिकेच्या अधिकार्‍यांनी केला आहे.

उपयोगकर्ता शुल्कातून कचरा संकलन सेवा अधिक सक्षम होणार उपयोगकर्ता शुल्काच्या माध्यमातून आरोग्य विभागाच्या सेवा सुधारण्यासाठी प्रयत्न केले जाणार आहेत. पिंपरी चिंचवड शहर स्वच्छ व सुंदर होण्यासाठी महापालिका कटिबद्ध आहे. महिला बचत गटांद्वारे घरोघरी मिळकतकराची बिले वाटण्यात येत आहेत. जमा झालेल्या रकमेतून कचरा संकलन सेवा अधिक सक्षम करण्यात येईल, असे पालिकेचे अतिरिक्त आयुक्त जितेंद्र वाघ यांनी सांगितले.

निवासी             1 लाख 3 हजार 56

बिगरनिवासी        7 हजार 59

मिश्र                  1 हजार 645

औद्योगिक              620

एकूण           1 लाख 12 हजार 380