Prashant Kishor NCP: महाराष्ट्राच्या राजकारणात सध्या एक नवी चर्चा सुरु आहे. निवडणूक रणनीतीचे ‘मास्टरमाइंड’ मानले जाणारे प्रशांत किशोर हे आता राष्ट्रवादी काँग्रेस पक्षासाठी रणनीती आखणार का? अशी जोरदार चर्चा राजकीय वर्तुळात सुरू झाली आहे. सूत्रांच्या माहितीनुसार, प्रशांत किशोर आणि उपमुख्यमंत्री सुनेत्रा पवार यांच्यात नुकतीच एक महत्त्वाची बैठक पार पडल्याची माहिती समोर येत आहे. या बैठकीला खासदार पार्थ पवार आणि जय पवारही उपस्थित असल्याची चर्चा आहे.
सूत्रांच्या दाव्यानुसार, या बैठकीत आगामी राजकीय रणनीती, पक्षाची संघटनात्मक बांधणी आणि भविष्यातील निवडणूक तयारी यावर सविस्तर चर्चा झाल्याचे सांगितले जात आहे. विशेष म्हणजे, राष्ट्रवादी काँग्रेसच्या काही वरिष्ठ नेत्यांनी या चर्चेला “सकारात्मक” असल्याचे संकेत दिल्याची माहितीही पुढे येत आहे. मात्र, पक्षाकडून किंवा प्रशांत किशोर यांच्या टीमकडून अद्याप याबाबत अधिकृत दुजोरा देण्यात आलेला नाही.
अजित पवार यांच्या निधनानंतर पक्षात नेतृत्व आणि संघटनात्मक पातळीवर काहीशी अस्थिरता निर्माण झाल्याची चर्चा सातत्याने होत आहे. काही ज्येष्ठ नेते नाराज असल्याच्या चर्चा अधूनमधून पुढे येतात. त्याचवेळी पक्षातील निर्णयप्रक्रिया, गटबाजी आणि नेतृत्वाची दिशा यावरून अनेक प्रश्न उपस्थित होताना दिसत आहेत.
राजकीय निरीक्षकांच्या मते, पक्षासमोर सध्या सर्वात मोठं आव्हान म्हणजे संघटना पुन्हा मजबूत करणं आणि कार्यकर्त्यांमध्ये विश्वास निर्माण करणं. अशा परिस्थितीत प्रशांत किशोर यांच्यासारख्या निवडणूक रणनीतीत तज्ज्ञ असलेल्या व्यक्तीची एंट्री राष्ट्रवादीसाठी महत्त्वाची ठरू शकते.
देशातील अनेक निवडणुकांमध्ये प्रशांत किशोर यांची रणनीती चर्चेचा विषय ठरली आहे. त्यांनी विविध पक्षांसोबत काम करताना प्रचाराची पद्धत, मतदारांपर्यंत पोहोचण्याची रणनीती आणि डेटा-आधारित निवडणूक व्यवस्थापनावर भर दिला. काही ठिकाणी त्यांचे प्रयोग यशस्वी ठरले, तर काही ठिकाणी अपेक्षित निकाल मिळाले नाहीत. तरीही, निवडणूक व्यवस्थापनातील त्यांचं कौशल्य राजकीय क्षेत्रात मान्य केलं जातं.
महाराष्ट्रात जर प्रशांत किशोर यांनी राष्ट्रवादीसाठी प्रत्यक्ष काम करण्यास सुरुवात केली, तर त्याचा राज्याच्या राजकारणावर मोठा परिणाम होऊ शकतो. विशेषतः आगामी निवडणुकांच्या पार्श्वभूमीवर हा निर्णय पक्षासाठी गेमचेंजर ठरतो का, हे पाहणं महत्त्वाचं असेल.
प्रशांत किशोर यांच्या एंट्रीनंतर महाराष्ट्रात ‘बिहार पॅटर्न’ची चर्चा पुन्हा रंगू लागली आहे. संघटनात्मक बदल, बूथस्तरीय रणनीती आणि प्रतिमानिर्मितीवर भर देत राष्ट्रवादी स्वतःला नव्याने उभी करण्याचा प्रयत्न करणार का? हा प्रश्न राजकीय वर्तुळात चर्चेचा विषय आहे.
या सर्व चर्चांदरम्यान एक गोष्ट स्पष्ट आहे की, राष्ट्रवादी काँग्रेससमोर सध्या स्वतःची प्रतिमा आणि संघटनात्मक ताकद पुन्हा उभी करण्याचं मोठं आव्हान आहे. आणि जर प्रशांत किशोर यांची एंट्री झाली, तर महाराष्ट्राच्या राजकारणात एक नवा अध्याय सुरू होण्याची शक्यता नाकारता येणार नाही.
