नालासोपारा : वसई पूर्व रेंज नाका परिसरात शासकीय कर्तव्य बजावत असलेल्या पोलीस कर्मचाऱ्यावर तरुणाने प्राणघातक हल्ला केल्याची धक्कादायक घटना घडली आहे.
पोलिसांनी दिलेल्या माहितीनुसार 03 मार्च रोजी दुपारच्या सुमारास एका मोबाईल शॉपजवळ, रेंज नाका, वसई पूर्व येथे सहकारी पोलीस कर्मचारी विनोद माने यांच्यासह फिर्यादी पोलीस कर्मचारी ट्रिपलसीट कारवाई करत होते. यावेळी दुचाकीवरील चालक अभिषेक जैसवार (21) याने कारवाईस अडथळा निर्माण करत वाद घातला.
वादाचे रूपांतर अचानक हिंसक प्रकारात झाले. आरोपीने जिवे ठार मारण्याच्या उद्देशाने रस्त्यावर पडलेला दगड उचलून फिर्यादीच्या डोक्याच्या पाठीमागे जोरदार मारहाण केली. फिर्यादी खाली पडल्यावरही आरोपीने दगडाने डोक्यावर अनेक घाव घालून गंभीर जखमी केले.
या प्रकरणी वालीव पोलीस ठाण्यात आरोपीविरोधात शासकीय कर्तव्यात अडथळा आणणे व जीवे मारण्याचा प्रयत्न केल्याप्रकरणी गुन्हा दाखल करण्यात आला असून आरोपीला ताब्यात घेतला आहे.पुढील तपास सुरू आहे.दरम्यान कारवाई दरम्यान पोलिसांवर वारंवार होणारे हल्ले ही चिंतेचे बाब असून याविषयी कठोर पाऊले उचलण्याची आवश्यकता आहे.
