भाईंदर : मिरा-भाईंदर महापालिकेच्या नवनिर्वाचित महापौर डिंपल मेहता व उपमहापौर ध्रुवकिशोर पाटील यांनी बुधवारी आपापल्या पदाचा कार्यभार आ. नरेंद्र मेहता, आयुक्त राधाबिनोद शर्मा यांच्या उपस्थितीत स्वीकारला. यावेळी त्यांनी शहरात वाढणाऱ्या अनधिकृत बांधकामांवर चिंता व्यक्त केली.
शहरात अनधिकृत बांधकामांचा सुळसुळाट झाला असून भविष्यात होणाऱ्या या बांधकामांना रोखण्यासाठी झिरो टॉलरन्स पॉलिसी राबविण्याचा विचार करण्यात येईल, अशी अपेक्षा महापौरांनी व्यक्त केली. गेल्या महिन्यात पार पडलेल्या पालिका निवडणुकीच्या कालावधीत तसेच त्यापूर्वी शहरातील विविध भागांमध्ये मोठ्याप्रमाणात अनधिकृत बांधकामे झाल्याचे त्यांनी सांगितले. अशा बांधकामांविरोधात लोकांच्या अनेक तक्रारी देखील प्राप्त झाल्याचे त्यांनी निदर्शनास आणून दिले.
अशा अनधिकृत बांधकामांमुळे शहराच्या नियोजित विकासात सतत अडथळा निर्माण होत आहे. त्याला आळा घालण्यासाठी तसेच शहराचा नियोजित विकास व शहराचे नियोजन बिघडू नये, याकरिता भविष्यात कोणत्याही प्रकारचे अनधिकृत बांधकाम होणार नाही, याची दक्षता पालिकेकडून घेण्यात यावी, अशी अपेक्षा त्यांनी व्यक्त केली. याबाबतचे पत्र आयुक्त राधाबिनोद शर्मा यांना दिल्याचे त्यांनी सांगितले. त्यात अनधिकृत बांधकामे रोखण्यासाठी झिरो टॉलरन्स पॉलिसी राबविण्याची गरज असल्याचे स्पष्ट केले.
यावर लवकरच विचार करण्यात येऊन निर्णय घेतला जाईल, अशी अपेक्षा त्यांनी व्यक्त केली. ज्या प्रभागात अनधिकृत बांधकाम होईल, अशा बांधकामासाठी प्रभाग अधिकारी व कर्मचाऱ्यांवर जबाबदारी निश्चित करून त्यांच्यावर कठोर कारवाईची आवश्यकता असल्याचे मत त्यांनी व्यक्त केले. यावेळी भाजप जिल्हाध्यक्ष दिलीप जैन, आ. मेहता यांच्या पत्नी सुमन यांसह भाजपचे सर्व नगरसेवक, पदाधिकारी उपस्थित होते.
