मनवेलपाडा: पालघर जिल्ह्यात सुरू असलेल्या मुसळधार पावसामुळे वसई-विरार शहरासाठी अत्यंत महत्त्वाचे मानले जाणारे धामणी धरण जवळपास पूर्ण क्षमतेने भरले आहे. धरणातील जलसाठा तब्बल ९७ टक्क्यांवर पोहोचल्याने लाखो नागरिकांना मोठा दिलासा मिळाला आहे.
मागील काही दिवसांपासून सुरू असलेल्या संततधार पावसामुळे धरण क्षेत्रात मोठ्या प्रमाणात पाण्याची आवक होत असून, यंदा पाणीटंचाईची भीती जवळपास दूर झाली आहे.
१ जूनपासून आतापर्यंत पालघर जिल्ह्यात सुमारे २,६६४ मिमी पावसाची नोंद झाली आहे. या विक्रमी पावसाचा थेट फायदा धामणी धरणाला झाला असून, धरणातील पाणीसाठा झपाट्याने वाढला आहे.
त्यामुळे आगामी उन्हाळ्यातही वसई-विरारकरांना नियमित व सुरळीत पाणीपुरवठा होण्याची शक्यता अधिक बळावली आहे.
धामणी धरण हे वसई-विरार शहराच्या पाणीपुरवठ्याचा प्रमुख आधार असल्याने प्रत्येक वर्षी नागरिकांचे लक्ष धरणातील जलसाठ्याकडे लागलेले असते. यंदा मान्सूनने दमदार हजेरी लावल्यामुळे धरण समाधानकारकरीत्या भरले असून, पाणीपुरवठ्याबाबतचे चित्र सकारात्मक झाले आहे.
दरम्यान, हवामान विभागाने पुढील काही दिवसही पालघर आणि परिसरात मध्यम ते मुसळधार पावसाचा अंदाज व्यक्त केला आहे. त्यामुळे धरण पूर्ण क्षमतेने भरण्याची शक्यता असून, प्रशासनाकडून धरणातील पाणीपातळीवर सातत्याने लक्ष ठेवले जात आहे. आवश्यकतेनुसार पाण्याचा विसर्ग करण्याबाबतही नियोजन करण्यात येणार आहे.
धामणी धरणातील वाढता जलसाठा हा केवळ प्रशासनासाठीच नव्हे, तर वसई-विरारमधील लाखो नागरिकांसाठी दिलासादायक ठरला आहे. यामुळे आगामी काळात पाणीपुरवठा अधिक स्थिर राहण्याची अपेक्षा व्यक्त केली जात आहे.
