वणी : पुढारी वृत्तसेवा
विवाहित महिला अविवाहित असल्याचे भासवून तिचा विवाह सोलापूर जिल्ह्यातील एका युवकाशी लावून देत लाखोंची आर्थिक फसवणूक केल्याचा धक्कादायक प्रकार उघडकीस आला आहे. या प्रकरणी नऊ जणांविरुद्ध गुन्हा दाखल करण्यात आला असून एका संशयित महिलेला अटक करण्यात आली आहे.
विशाल जयवंत धावणे (वय २४, रा. नरखेड, ता. मोहोळ, जि. सोलापूर) हे शेती व्यवसाय करतात. विवाहासाठी वधूचा शोध सुरू असताना त्यांचा संपर्क एका विवाह एजंटाशी आला. एजंटामार्फत एका महिलेची ओळख करून देण्यात आली.
मात्र, संबंधित महिलेचा यापूर्वी विवाह झाला असून ती तीन मुलांची आई असल्याची माहिती लपवून तिला अविवाहित असल्याचे सांगण्यात आल्याचा आरोप करण्यात आला आहे. फिर्यादीनुसार, नऊ जणांच्या टोळीने संगनमताने फसवणुकीचा कट रचला. विवाह ठरविताना एजंटाला ५० हजार रुपये व वधूच्या वडिलांना २ लाख ५० हजार रुपये देण्याचे ठरले होते.
७ जून २०२६ रोजी दिंडोरी तालुक्यातील कसबे वणी येथील मंदिरात विवाह पार पडला. विवाहानंतर प्रवासादरम्यान संबंधित महिलेला वाहनातून उतरविण्यात आले आणि ती अचानक गायब झाली. यानंतर चौकशी केल्यावर तिचा पूर्वीच विवाह झालेला असून तिला तीन मुले असल्याचे समोर आले.
या प्रकरणी बापू अंधारे, काही अनोळखी एजंट, महिला व पुरुषांसह एकूण नऊ जणांविरुद्ध गुन्हा दाखल करण्यात आला आहे. एका महिलेला अटक करण्यात आली असून, इतर संशयितांचा शोध सुरू आहे. या टोळीने यापूर्वीही अशाच प्रकारे फसवणूक केल्याची शक्यता पोलिसांनी व्यक्त केली आहे.
