देवळा (जि. नाशिक) : डॅलस, अमेरिका येथे शिंपी परिवाराने घरी पर्यावरणपूरक तसेच कमीत कमी खर्चात यंदा गणपती बाप्पाचा देखावा सादर केला आहे.
यावर्षीच्या गणेश सजावटीत विविध मराठी सणांचे आणि त्यांचे पंचांगानुसार महत्त्व उत्कृष्टपणे उजागर करण्यात आले आहे. फिरणारे गरबा आणि कागद व प्रिंट्स वापरून तयार केलेल्या वटपौर्णिमेच्या आकर्षक मिनिएचर्सने सजावटीला एक खास लूक दिला आहे.
अमेरिकेत स्थायिक नाशिकच्या मूळ रहिवासी वैशाली शिंपी यांनी गेल्या वर्षी आपल्या घरी बाप्पाची स्थापना करताना 'चांद्रयान-३'ची हुबेहूब प्रतिकृती सादर केली होती. वैशाली शिंपी या सॉफ्टवेअर इंजिनिअर असून अमेरिकेत डॅलस, टेक्सास कंपनीत नोकरीस आहेत.
सर्वात उल्लेखनीय गोष्ट म्हणजे पर्यावरणपूरक गणेश मूर्ती त्यांच्या शक्ती या ११ वर्षांच्या मुलाने हाताने तयार केली आहे. सजावटीत सणांचे महत्त्व वर्षभर कलात्मक पद्धतीने दर्शवून, कला आणि पर्यावरणस्नेहीचा विचार यांचा सुंदर संगम साधला आहे.
मराठी कॅलेंडर वर्षामध्ये बारा महिने असून, हे चंद्राच्या कालगणनेवर आधारित असतात. प्रत्येक महिन्याचे खास धार्मिक, सांस्कृतिक आणि सामाजिक महत्त्व आहे. मराठी लोकांच्या जीवनशैलीत या महिन्यांचे स्थान अत्यंत महत्त्वाचे मानले जाते. त्यासंबंधित सण, परंपरा, आणि सणांच्या नोंदी पुढीलप्रमाणे आहेत :
चैत्र हा मराठी वर्षाचा पहिला महिना असून, गुढी पाडवा या दिवशी हिंदू नववर्षाची सुरुवात होते. चैत्र नवरात्र, रामनवमी, तसेच वैशाख महिन्यातील अक्षय तृतीया हे सण धार्मिक व सांस्कृतिक महत्त्वाचे मानले जातात. यानंतरचे महिने, जसे की आषाढ, श्रावण, आणि भाद्रपद, पावसाळ्याशी संबंधित असल्याने उत्सवाचा माहोल असतो.
गणपती बाप्पाचे आगमन आणि विसर्जन याच महिन्यात साजरे होतात. यानंतर आश्विन महिन्यातील नवरात्र आणि दसरा हे सण सणाच्या परंपरांचे प्रतीक मानले जातात.
कार्तिक महिन्यात दिवाळीच्या सणाचा उत्सव विशेष असतो, जिथे कुटुंब आणि मित्र मंडळी एकत्र येऊन सण साजरा करतात. पुढे मार्गशीर्ष, पौष, माघ, आणि फाल्गुन महिन्यांमध्ये विविध धार्मिक आणि सांस्कृतिक कार्यक्रम पार पडतात.
संपूर्ण वर्षभर सणांचे विविध रंग आणि धार्मिक परंपरा प्रत्येक महिन्याला आपल्या सण-उत्सवांचा आणि परंपरांचा ठसा आहे .जो मराठी संस्कृतीचे अनन्यसाधारण महत्त्व दाखवतो.
शिंपी परिवार, डॅलस अमेरिका
