नाशिक : पुढारी वृत्तसेवा
त्र्यंबकेश्वर येथे व्हीआयपी दर्शनाच्या नावाखाली भाविकांची आर्थिक लूट करणाऱ्या बनावट दर्शनपास रॅकेटमध्ये पोलिसांनी आणखी दोन आरोपींना अटक केली. अभिषेक कडलग आणि ओम कडलग या दोघांना अटक करण्यात आली. या प्रकरणातील आरोपींची संख्या आता ४ झाली आहे.
यापूर्वी त्र्यंबकेश्वर देवस्थानचे विश्वस्त तथा राष्ट्रवादी काँग्रेसचे पदाधिकारी पुरुषोत्तम कडलग आणि त्यांचा साथीदार गोटीराम मनाजी पेहरे यांना अटक करण्यात आली होती. या प्रकरणात व्हीआयपी दर्शनाच्या नावाखाली भाविकांकडून मोठ्या प्रमाणात पैसे उकळले जात असल्याच्या तक्रारी पोलिसांकडे प्राप्त झाल्या होत्या.
११ एप्रिलला पंचवटीतील काही भाविकांना २०० रुपयांचा पास घेतल्यानंतरही लवकर दर्शन घडवून देण्याचे आमिष दाखवले होते. एका भाविकाकडून ३ हजार, तर इतरांकडून २ हजार रुपये घेतल्याचा प्रकार समोर आला.
या प्रकाराची शहानिशा करण्यासाठी ग्रामीण पोलिस अधीक्षक बाळासाहेब पाटील यांच्या मार्गदर्शनाखाली पोलिसांनी स्टिंग ऑपरेशन राबवले. पोलिसांनी भाविक बनून मंदिर परिसरात जात पुरावे गोळा केले असता एका दिवसातच मोठ्या प्रमाणात पैशांची वसुली होत असल्याचे उघड झाले.
या माहितीच्या आधारे रॅकेटचे धागेदोरे पुरुषोत्तम कडलग यांच्यापर्यंत पोहोचल्याचे स्पष्ट झाले. या प्रकरणाची व्याप्ती मोठी असून, आणखी काही आरोपींचा सहभाग असल्याची शक्यता व्यक्त करण्यात येत आहे. दरम्यान, या प्रकारामुळे त्र्यंबकेश्वर देवस्थानच्या व्यवस्थापनावर प्रश्नचिन्ह निर्माण झाले आहे.
