हरसूल : पुढारी वृत्तसेवा
त्र्यंबकेश्वर तालुक्यातील बेहडपाडा येथील एका ओहोळाजवळील करंजीच्या झाडाजवळ पती-पत्नीचा मृतदेह संशयास्पद परिस्थितीत आढळल्याने परिसरात हळहळ व्यक्त होत आहे.
महादू किसन पवार (४५) आणि रेखा महादू पवार (४२, रा. बेहडपाडा, ता. त्र्यंबकेश्वर) अशी मृत पती-पत्नीची नावे आहेत.
बेहडपाडा शिवारातील ओहोळकाठावर महादू पवार हे जमिनीवर मृतावस्थेत मिळाले. त्यांच्या मानेवर गळफासाचे व्रण आढळले. पत्नी रेखा पवार या करंजीच्या झाडाला गळफास घेतलेल्या अवस्थेत आढळल्या. स्थानिकांनी तातडीने घटनेची माहिती हरसूल पोलिस ठाण्याचे सहायक पोलिस निरीक्षक जीवन बोरसे यांना कळवली.
पोलिसांनी घटनास्थळी धाव घेत पंचनामा केला. मंगळवारी हरसूल ग्रामीण रुग्णालय शवविच्छेदन करत दोन्ही मृतदेह नातेवाईकांच्या ताब्यात देण्यात आले. त्यांच्या पश्चात बारावी झालेला मुलगा आहे. हरसूल पोलिस ठाण्यात मृत्यूची नोंद केली आहे. या घटनेमागील नेमके कारण अध्याप स्पष्ट झालेले नाही. सहायक पोलिस निरीक्षक जाधव यांच्या मार्गदर्शनाखाली तपास सुरू आहे.
