नाशिक : पुढारी वृत्तसेवा
सिंहस्थ कुंभमेळ्यानमित्त आयोजित गोदामहाआरती सोहळ्याच्या सुरक्षाव्यवस्थेत त्रुटी असल्याचा प्रकार समोर आला आहे. प्रसारमाध्यमांच्या प्रवेश परवानगीची रंगीत छायांकित प्रत वापरून एका तरुणाने कार्यक्रमस्थळी प्रवेश करण्याचा प्रयत्न केला. पोलिसांनी त्याला अडवून ओळखपात्राबाबत विचारणा केली असता समाधानकारक उत्तर मिळाले नाही.
त्यामुळे पासची पुन्हा तपासणी केली असता, त्याने माध्यम प्रतिनिधीच्या मूळ पासची रंगीत प्रत काढून तिचा गैरवापर केल्याचे उघड झाले. पोलिसांनी संशयित तरुणाला ताब्यात घेतले असून, या प्रकारचा तपास सुरू आहे.
महाआरती सोहळ्यासाठी गोदाघाट परिसरात कडेकोट सुरक्षाव्यवस्था तैनात करण्यात आली होती. कार्यक्रमस्थळी प्रवेशासाठी विविध ठिकाणी तपासणी नाके उभारण्यात आले होते. प्रसारमाध्यमांच्या प्रतिनिधींनाही स्वतंत्र प्रवेश परवाने देण्यात आले होते. अशा परिस्थितीत एका तरुणाने माध्यम प्रतिनिधीची पासची रंगीत छायांकित प्रत घेऊन प्रवेश मिळवण्याचा प्रयत्न केला.
पोलिसांनी त्याला रोखल्यानंतर संस्थेचे ओळखपत्र मागितले. मात्र, त्याला समाधानकारक उत्तर देता आले नाही. त्यानंतर प्रवेश परवान्याची बारकाईने तपासणी केली असता, तो मूळ पास नसून त्याची रंगीत प्रत असल्याचे स्पष्ट झाले. त्यामुळे पोलिसांनी संशयिताला ताब्यात घेऊन चौकशी सुरू केली आहे.
मात्र, या घटनेमुळे सुरक्षाव्यवस्थेतील तपासणी प्रक्रियेवर प्रश्नचिन्ह निर्माण झाले आहे. कार्यक्रमस्थळी प्रवेश करण्यापूर्वी तीन ते चार ठिकाणी तपासणी केली जात असताना, रंगीत छायांकित पासच्या आधाराने संशयित तरुण प्रसारमाध्यमांसाठी राखीव मंचापर्यंत कसा पोहोंचला, असा प्रश्न उपस्थित होत आहे. प्रवेश परवान्यांची पडताळणी नेमकी कशी करण्यात आली आणि तपासणीतील त्रुटी कुठे राहिली, याचा तपासातून उलगडा होण्याची अपेक्षा आहे.