नाशिकरोड : सिंहस्थ कुंभमेळ्यासाठी रेल्वे व्यवस्थापन सुरळीत होण्यासाठी विभागीय समन्वय, पायाभूत सुविधा, वाहतूक व्यवस्थापन, स्वच्छता, सुरक्षा आणि अन्य महत्त्वाच्या बाबींवर चर्चा झाली. यावेळी प्रवाशांच्या सोयीसाठी रेल्वे कटिबद्ध असल्याचे प्रतिपादन भुसावळ विभागाचे रेल्वे व्यवस्थापक पुनीत अग्रवाल यांनी केले. नाशिकरोडच्या विभागीय आयुक्त कार्यालयात आयोजित या बैठकीत विभागीय आयुक्त डॉ. प्रवीण गेडाम, राज्य शासनाचे अधिकारी तसेच रेल्वेचे वरिष्ठ अधिकाऱ्यांची उपस्थित होती. सिंहस्थ कुंभमेळ्याच्या नियोजनासाठी ही समन्वय बैठक झाली.
बैठकीस कुंभमेळा आयुक्त शेखर सिंह, महापालिका आयुक्त मनीषा खत्री, जिल्हाधिकारी आयुष प्रसाद, जिल्हा परिषदेचे मुख्य कार्यकारी अधिकारी ओंकार पवार तसेच रेल्वेचे वरिष्ठ अधिकारी उपस्थित होते. ऐतिहासिक आणि भव्य धार्मिक सोहळ्यासाठी भुसावळ रेल्वे विभाग संपूर्णपणे सज्ज असून, उत्कृष्ट समन्वय, आधुनिक पायाभूत सुविधा व प्रवाशांच्या सोयी निश्चित करण्यासाठी कटिबद्ध असल्याचे रेल्वेतर्फे सांगण्यात आले.
रेल्वे प्रशासन आणि स्थानिक यंत्रणेतील समन्वय आणि पाहणी उपक्रम हे कुंभमेळ्यासाठी अपेक्षित लाखो भाविकांना दर्जेदार सुविधा आणि व्यवस्थापन प्रदान करण्याच्या बांधिलकीचे प्रतीक असल्याचे रेल्वेच्या अधिकाऱ्यांनी नमूद केले. कुंभमेळ्यासाठी सर्वात जास्त भाविक रेल्वेने नाशिकला येतात. त्यामुळे रेल्वेची भूमिका, नियोजन महत्त्वाचे असल्याचेही सांगण्यात आले.
