नाशिक : 'आपले नाशिक-हरित नाशिक' या संकल्पनेवर आधारित 'हरित नाशिक' या मोहिमेचा सोमवारपासून (दि.१५) शहरात प्रारंभ केला जात आहे. ही मोहिम सकाळी ९ वाजता सुरू झाली आहे. वृक्ष लागवडीबाबतची महापालिका आणि प्रशासनाची पूर्व तयारी झाली असून, कुंभमेळा मंत्री गिरीश महाजन यांच्या हस्ते या मोहिमेचा प्रारंभ केला जात आहे.
नियोजित ठिकाणी वृक्ष लागवड करण्यासाठी खड्डे करण्यात आले असून, माती तसेच खत उपलब्ध करून देण्यात आले आहे. वृक्षांच्या जाती व आकारमानानुसार प्रशासनाकडून योग्य ती खबरदारी घेण्यात येऊन तसे खड्डे करण्यात आले आहेत. मखमलाबाद परिसरातील कॅनॉल लगतच्या सर्वे नंबर ६९ या महानगरपालिकेच्या हरित पट्ट्यातील सुमारे अडीच एकर जागेवर तसेच गोदावरीच्या किनारी सुयोजित प्रकल्पालगत एकत्रितपणे सुमारे एक हजार विविध देशी प्रजातींच्या झाडांची लागवड करण्यात येणार आहे. कुंभमेळा मंत्री गिरीश महाजन तसेच विविध मान्यवरांच्या हस्ते वृक्षारोपण करण्यात येणार आहे.
महानगरपालिकेच्या वतीने देखील कुंभमेळ्याच्या निमित्ताने विविध विकास कामांचे भूमिपूजन देखील होत आहे. जिल्ह्यातील सर्व मंत्री व लोकप्रतिनिधी याप्रसंगी उपस्थित राहणार आहेत. तसेच राष्ट्रीय संत समितीचे गणमान्य महंत, मठाधिपती, महामंडलेश्वर व महामंत्री तसेच नाशिक व त्र्यंबकेश्वर येथील सर्व १३ आखाड्यांचे प्रमुख उपस्थित राहणार आहेत. या उपक्रमाला स्वामी समर्थ दिंडोरी प्रणित सेवा केंद्र, श्री जगद्गुरु नरेंद्राचार्य स्वामी महाराज, श्री अण्णासाहेब धर्माधिकारी प्रतिष्ठान, आर्ट ऑफ लिविंग, श्री स्वामीनारायण संस्थान, इस्कॉन आदीचे पदाधिकारी व भक्तगण उपस्थित राहून वृक्ष लागवड उपक्रमात सहभाग घेणार आहेत. तसेच शहरातील अनेक नामवंत सामाजिक संस्था, सेवाभावी संघटना यांनी सहकार्य केलेले असून, यामध्ये क्रेडाई, आयमा, निमा, नरेडको, पर्यावरण गतीविधि सायकलिस्ट असोसिएशन संघटनांचे पदाधिकारी, भक्तगण आदी उपस्थित राहणार आहेत.
हरित मोहिमेअंतर्गत अधिक संख्येने लोकसहभागातून वृक्षारोपण व्हावे याकरिता डिजिटल ॲपच्या माध्यमातून लोकांना सहभागी करून घेण्यात येणार आहे. याकरिता 'हरित नाशिक' नावाच्या मोबाईल ॲपचे देखील उद्घाटन करण्यात येणार आहे. या ॲपद्वारे नाशिककरांना त्यांच्या परिसरात वृक्ष लागवड करण्यासाठी नावनोंदणी करता येईल. २५ पेक्षा अधिक वृक्ष लागवड एखादी संस्था किंवा व्यक्तीमार्फत त्यांच्या उपलब्ध जागेनुसार मागणी करण्यात आल्यास त्यांना प्रशासनामार्फत झाडे उपलब्ध करून दिले जातील. 'हरित नाशिक' मोहिमेच्या कार्यक्रमात वृक्षारोपणासाठी जास्तीत जास्त नाशिककरांनी उपस्थित रहावे असे आवाहन विविध संघटना व संस्थांमार्फत करण्यात आलेले आहे.
15 हजार वृक्षांची लागवड
मंत्री गिरीश महाजन यांच्या पुढाकारातून आंध्रप्रदेशातील गोदावरीच्या अंतिम भागात असलेल्या राजामुंद्री येथील नर्सरीमधून देशी प्रजातीची १० ते १५ फुट उंचीपर्यंतची झाडे शहरात आणण्यात आली आहेत. टप्प्याटप्प्याने एकूण १५ हजार वृक्षांची लागवड करण्यात येणार असून, सीएसआर व लोक सहभागातून सदर वृक्ष उपलब्ध होत आहेत. सदर वृक्षांच्या लागवडी व संवर्धनाकरिता महानगरपालिका, विविध सामाजिक संघटना, अध्यात्मिक संस्था व एनजीओ यांचा सहभाग घेण्यात येत आहे.
