नाशिक : पुढारी वृत्तसेवा
जिल्ह्यातील दूधविक्रेत्यांनी उच्च गुणप्रतीचे, भेसळविरहित दूध व दुग्धजन्य पदार्थांचीच विक्री करावी, असे आवाहन अपर जिल्हाधिकारी तथा जिल्हास्तरीय दूध भेसळ प्रतिबंधक समितीचे अध्यक्ष बाबासाहेब पारधे यांनी केले आहे.
लहान मुलांच्या व ग्राहकांच्या आरोग्यावर दुष्परिणाम होऊ नये, यासाठी सर्व दूधविक्रेते, स्वीटमार्ट धारक, किरकोळ दूध व दुग्धजन्य पदार्थ विक्री करणारे यांनी दूध व दुग्धजन्य पदार्थांची विक्री करताना ते पदार्थ उच्च गुणप्रतीचे, भेसळविरहित व पदार्थांवर मुदतपूर्व दिनांक नमूद असल्याची खात्री करणे आवश्यक आहे. भेसळ रोखण्यासाठी मोबाइल टेस्टिंग व्हॅनच्या माध्यमातून तपासणीसाठी धडक मोहीम राबविणार आहे. तसेच गुजरातमधून येणारा खवा, मावा व इतर दुग्धजन्य पदार्थांची तपासणी करणार आहे.
पथकांमार्फत तपासणी केलेले दूध व दुग्धजन्य पदार्थ कमी गुणप्रतीचे, भेसळयुक्त व मुदतपूर्व दिनांक नमूद नसल्याचे आढळल्यास संबंधित आस्थापनेवर जिल्हास्तरीय समितीमार्फत अन्नसुरक्षा व मानके कायदा 2006 अंतर्गत दंडात्मक व कायदेशीर कार्यवाही होणार आहे. अपर जिल्हाधिकाऱ्यांच्या अध्यक्षतेत जिल्हास्तरीय दूध भेसळ प्रतिबंधक समितीच्या बैठकीत निर्णय घेण्यात आल्याचे जिल्हा दुग्धव्यवसाय विकास अधिकारी वाय. आर. नागरे यांनी कळविले आहे.
हेही वाचा :
