राज्य परिवहन महामंडळाच्या सिन्नर आगारातून देवपूरकडे निघणारी बस सकाळी फलाटावर लावताना अचानक ब्रेक नादुरुस्त झाल्याने बस थेट फलाटावर चढली आणि या दुर्घटनेत दापूर येथील नऊ वर्षांच्या बालकाचा मृत्यू झाला, तर त्याची आई तसेच काही प्रवाशी गंभीर जखमी झाले.
सिन्नरमधील एसटी बस अपघातानंतर जबाबदार अधिकाऱ्यांवर मोठी कारवाई करण्यात आली असून, या घटनेने संपूर्ण परिवहन विभागात खळबळ उडाली आहे. बुधवारी घडलेल्या या भीषण अपघातात छोट्या आदर्श बोराडे या चिमुकल्याला जीव गमवावा लागला, तर काही प्रवासी जखमी झाले होते. अपघातामागील प्राथमिक कारणे समोर आल्यानंतर विभागाने चौघांना निलंबित करत कठोर भूमिका घेतली आहे.
या अपघातानंतर सर्वात गंभीर बाब पुढे आली ती म्हणजे लॉग बुकमध्ये आधीच करण्यात आलेली नोंद. बसच्या ब्रेकमध्ये बिघाड असल्याची नोंद लॉग-बुकमध्ये स्पष्टपणे लिहिलेली होती. प्रेशर कमी असल्याचंही त्यात नमूद होतं. इतकं स्पष्ट लिहूनही बस गॅरेजमधूनच रस्त्यावर काढण्यात आली. हा धोकादायक निर्णय नेमका कोणी घेतला? आणि अशा अवस्थेत बस रस्त्यावर कशी आली? या दोन्ही प्रश्नांची उत्तरे लोकांकडून मागणी केली जात आहे.
चौकशीदरम्यान लक्षात आलं की एसटीच्या कर्मचाऱ्यांनी ही नोंद दुर्लक्षित केली. हीच गंभीर निष्काळजीपणा मानून सिन्नर एसटी विभागाने मुख्य मेकॅनिक, सहाय्यक मेकॅनिक, वाहन परीक्षक आणि बस चालक या चौघांना तात्काळ निलंबित केले आहे. वाहनाची तपासणी करूनही, बसची तांत्रिक स्थिती धोकादायक असल्याचं दुर्लक्षित करण्यात आलं. त्यामुळेच पुढे हा भीषण अपघात घडला, अशी माहिती तपासात समोर आली आहे.
अपघाताच्या दिवशी ही बस अचानक नियंत्रण सुटून थेट फलाटावर आदळली. बस इतक्या वेगाने फलाटावर चढल्याने धडक जबरदस्त होती. या दुर्घटनेत आदर्श बोराडे या छोट्या मुलाचा मृत्यू झाला. ही घटना पाहून परिसरातील लोक हादरून गेले. जखमींना तातडीने रुग्णालयात दाखल करण्यात आलं. सुदैवाने त्यापैकी काहींची प्रकृती आता स्थिर आहे.
या प्रकरणी सिन्नर पोलीस ठाण्यात एसटीच्या पाच कर्मचाऱ्यांवर गुन्हा दाखल करण्यात आला आहे. यात निष्काळजीपणा, दुर्लक्ष आणि प्रवाशांच्या जीवाशी खेळल्याचे गंभीर आरोप आहेत. परिवहन विभागानेही आंतरगत चौकशी तीव्र केली असून, भविष्यात अशा घटना टाळण्यासाठी कोणत्या सुधारणा करायच्या याचा आढावा घेण्यात येत आहे.
दरम्यान, स्थानिक नागरिकांचा संतापही मोठ्या प्रमाणात व्यक्त होत आहे. लोकांचा सवाल आहे की, जर लॉग बुकमध्ये स्पष्ट बिघाडाची नोंद होती, तर बस रस्त्यावर आणण्याची गरजच काय होती? विभागाने अशा कर्मचाऱ्यांवर कठोरात कठोर कारवाई करावी, अशी मागणी नागरिकांकडून होत आहे.
हे प्रकरण उघड झाल्यानंतर एसटी विभागाने तांत्रिक तपासणी आणि सुरक्षिततेची नियमावली अधिक काटेकोर करण्याची तयारी दर्शवली आहे. परंतु, आधीच झालेल्या जीवितहानीमुळे हा प्रश्न गंभीर बनला आहे. आता पुढील कामकाजात अधिक पारदर्शकता आणि जबाबदारीची गरज जाणवते आहे.
