नाशिक : पुढारी वृत्तसेवा
भोंदू अशोक खरात प्रकरणाच्या पार्श्वभूमीवर तपास यंत्रणांकडून अत्यंत महत्त्वाचे आणि संवेदनशील आवाहन करण्यात आले आहे. या प्रकरणातील पीडित महिलांची ओळख कोणत्याही परिस्थितीत उघड करू नये, असे स्पष्ट निर्देश पोलिसांकडून सर्व माध्यम प्रतिनिधी तसेच सोशल मीडिया प्लॅटफॉर्म्स आणि संबंधित घटकांना दिले आहेत.
काही वृत्तवाहिन्या इन्स्टाग्राम हॅन्डल्स, युट्यूब न्यूज पोर्टल्स, ऑनलाइन न्यूज साइट्स आणि इतर सोशल मीडिया माध्यमांवरून करण्यात येणाऱ्या वृत्तांकनातून पीडित महिलेची ओळख अप्रत्यक्षपणे उघड होत असल्याचे निदर्शनास आले आहे.
काही ठिकाणी पीडितेचा चेहरा ब्लर करून व्हिडिओ दाखविले जात असले, तरी तिचा पेहराव, अंगकाठी, उंची, हालचाली आणि हावभाव यावरून संबंधित व्यक्तींच्या ओळखीच्या लोकांना तिची ओळख पटत असल्याचे समोर आले आहे.
या प्रकारामुळे संबंधित महिलांना आणि त्यांच्या कुटुंबीयांना मानसिक त्रास सहन करावा लागत आहे. भारतीय नागरिक सुरक्षा संहिता २०२३ च्या कलम ७२(१) नुसार, कोणत्याही पीडित महिलेची ओळख उघड होईल, असे कृत्य करणे हा दखलपात्र गुन्हा आहे. त्यामुळे अशा प्रकारचे वृत्तांकन करणाऱ्यांवर कायदेशीर कारवाई होऊ शकते,
असा इशाराही पोलिसांनी दिला आहे. याशिवाय काही सामाजिक संस्था पीडित कुटुंबीयांना भेटून माहिती घेण्याचा प्रयत्न करत असल्याचेही समोर आले आहे. या कृतीमुळेही ओळख उघड होण्याचा धोका निर्माण झाला आहे.
