नाशिक : उपमुख्यमंत्री अजित पवार शुक्रवारी (दि. २) जिल्ह्याच्या दौऱ्यावर येत असून, त्यांच्या उपस्थितीत सुरगाणा येथे शेतकरी मेळावा होणार आहे.
आगामी विधानसभा निवडणुकीच्या अनुषंगाने या दौऱ्याला विशेष असे महत्त्व असल्याने राष्ट्रवादी काँग्रेसतर्फे जय्यत तयारी करण्यात येत आहे. सुरगाणा येथे शुक्रवारी (दि. २) दुपारी १२ वाजता आयोजित शेतकरी मेळाव्याला अजित पवार मार्गदर्शन करतील. त्यानंतर दुपारी ३ ला कळवण बसस्थानकाचा भूमिपूजन सोहळा तसेच कळवण नगर पंचायतीच्या नवीन इमारतीचा लोकार्पण सोहळा पार पडणार आहे. सायंकाळी ५ वाजता नांदुरी ते सप्तश्रृंगीगड रस्ता व नांदुरी बसस्थानकाचे भूमिपूजन पवार यांच्या हस्ते होणार आहे. पवार यांच्या दौऱ्यामुळे कार्यकर्त्यांमध्ये उत्साह संचारला आहे.
