नाशिक : पुढारी ऑनलाइन डेस्क | मंगळवारी (दि. 15) रात्री उशिरा नाशिक येथील द्वारका परिसरातील काठे गल्लीमध्ये अनधिकृत दर्गा पाडण्याचा प्रयत्न करणाऱ्या महापालिकेच्या पथकावर हल्ला झाल्यानंतर तणाव निर्माण झाला आहे. परिसरातील वीजपुरवठा खंडित झाल्याचा फायदा घेत जमावाने रात्री अचानक केलेल्या दगडफेकीत चार महापालिका अधिकारी आणि 21 पोलिस कर्मचारी जखमी झाले आहेत. या हिंसाचारात पोलीसांच्या पाच वाहनांचेही नुकसान झाले आहे.
उच्च न्यायालयाच्या आदेशानुसार बुधवारी (दि.16) रात्री सातपीर दर्गा विश्वस्तांनी दर्गा हटविण्याची प्रक्रिया सुरू केली होती. दरम्यान, दर्गा हटविण्यास विरोध करीत जमावाने परिसरात गोंधळ घालण्यास सुरुवात केली. जमाव हिंसक झाल्याने पोलिसांनी जमावावर लाठीमार करीत अश्रूधुराचा वापर केला. दरम्यान जमावाने केलेल्या दगडफेकीत 21 पोलीस अधिकारी-कर्मचारी जखमी झाले आहेत. पोलीस वाहनांचे नुकसान झाले. मध्यरात्री 2 वाजता परिस्थिती नियंत्रणात आली. त्यानंतर अतिक्रमीत दर्गा काढण्यात आला. परिसरात तणावपूर्ण शांतता आहे. पोलिसांनी सशयितांची धरपकड सुरु केली आहे.
नाशिक महानगरपालिकेने (NMC Nashik) मंगळवारी दि. 1 एप्रिल रोजी नोटीस बजावली होती, ज्यामध्ये काठे गल्ली येथील धार्मिक स्थळ अनधिकृत घोषित केले. पंधरा दिवसांच्या आत ते स्वेच्छेने हटवण्यास सांगितले होते. कोणतीही कारवाई न झाल्याने, बुधवारी (दि. 16) रात्री पोलिसांच्या मदतीने नागरी अधिकाऱ्यांनी येथे तोडफोड केली.
अधिकाऱ्यांनी सांगितले की, मध्यरात्रीनंतर परिस्थिती हिंसक होत गैरसमजातून 400 हून अधिक लोकांचा जमाव जमला त्यानंतर तब्बल 500 पोलिस कर्मचारी तैनात असूनही, या जमावाने बुधवारी (दि. 16) रात्री अचानक दगडफेक केली. ज्यामुळे अधिकाऱ्यांना अशांतता नियंत्रित करण्यासाठी अश्रुधुराचा वापर करावा लागला.
या परिसरात कारवाई करण्याची ही पहिलीच वेळ नसून 22 फेब्रुवारी 2025 रोजी, महानगरपालिकेने अनेक अनधिकृत धार्मिक स्थळांवरील अतिक्रमणे हटवली होती. त्यानंतर, न्यायालयाने हा दर्गा बेकायदेशीर असल्याचे आणि तो पूर्णपणे हटवला पाहिजे असा निर्णय दिला. त्या आदेशाचे पालन करून नवीनतम पाडकाम मोहीम राबविण्यात आली. तणाव लक्षात घेता, नाशिक पोलिसांनी परिसरातील आणि परिसरातील वाहतुकीचे मार्ग देखील बदलले आहेत.
फेब्रुवारीमध्ये, सकल हिंदू समाजाचे प्रतिनिधित्व करणाऱ्या एका गटाने दर्गा पाडण्याची मागणी केली आणि त्या जागी हनुमान मंदिर बांधण्याचा प्रस्ताव दिला. या गटाने 22 फेब्रुवारी 2025 रोजी मोठा निषेध करण्याची योजना आखली होती. अशांततेचा अंदाज घेत अधिकाऱ्यांनी परिसरात जमावबंदीचे आदेश लागू केले होते आणि मोठा पोलिस बंदोबस्तही तैनात केला होता. प्रतिबंधात्मक उपाय म्हणून अनेक हिंदू धार्मिक नेत्यांनाही यावेळी ताब्यात घेण्यात आले होते.
