नाशिक : पुढारी वृत्तसेवा
इंदिरानगर परिसरात एकतर्फी प्रेमातून २० वर्षीय तरुणीची निर्घृण हत्या करत फरार झालेल्या संशयित आरोपीने काही तासांतच गळफास घेऊन आत्महत्या केल्याची धक्कादायक घटना शनिवारी उघडकीस आली.
वैष्णवी अनिल आवारे (२०) हिची हत्या केल्यानंतर फरार झालेला साहिल अशोक लावारे (२६, रा. खडकपुरा, जि. यवतमाळ) याचा मृतदेह हत्या स्थळापासून काही अंतरावरील जॉगिंग ट्रॅकजवळ झाडाला गळफास घेतलेल्या अवस्थेत आढळला.
एकाच रात्रीत घडलेल्या हत्या आणि आत्महत्येच्या घटनांमुळे इंदिरानगर परिसरात खळबळ उडाली आहे. शुक्रवारी (दि. १७) रात्री रथचक्र चौकाजवळील वनसंपदा सोसायटीच्या प्रवेशद्वाराबाहेर वैष्णवी आवारेवर साहिल लावारे याने एकतर्फी प्रेमातून चाकूने हल्ला केला. मोठ्या प्रमाणात रक्तस्राव होऊन वैष्णवीचा घटनास्थळीच मृत्यू झाला.
हल्ल्यानंतर आरोपी दुचाकीवरून पळून गेला. घटनेची माहिती नागरिकांनी पोलिसांना दिली. पोलीस उपायुक्त किशोर काळे, सहाय्यक पोलीस आयुक्त सचिन बारी, इंदिरानगरचे वरिष्ठ पोलीस निरीक्षक मनोहर कारंडे घटनास्थळी दाखल झाले. पोलिसांनी हत्येसाठी वापरलेला चाकू जप्त केला.
वैष्णवीच्या मोबाईलमधील माहिती, सीसीटीव्ही फुटेज आणि तांत्रिक पुराव्यांच्या आधारे आरोपीचा शोध सुरू करण्यात आला. तपास सुरू असतानाच इंदिरानगर जॉगिंग ट्रॅकजवळ झाडाला तरुणाने गळफास घेतल्याची माहिती मिळाली. घटनास्थळी धाव घेतल्यानंतर तो मृतदेह साहिल लावारे याचाच असल्याचे निष्पन्न झाले. या प्रकरणी गोपाल बैरागी (२८) यांनी इंदिरानगर पोलीस ठाण्यात फिर्याद दिली.
