Nashik housing case 197 accused
नाशिक : सर्वसमावेशक गृहनिर्माण योजनेंतर्गत नाशिक महानगरपालिका क्षेत्रातील गैरव्यवहार प्रकरणात तब्बल १९७ आरोपींची नावे निष्पन्न झाली असून त्यांच्या विरोधात गुन्हे दाखल करण्यात आले आहेत. या प्रकरणाचा तपास प्राधान्याने सुरू असून, संबंधितांवर कठोर कारवाई केली जाईल, अशी माहिती राज्याचे मंत्री शंभूराज देसाई यांनी विधानपरिषदेत प्रश्नोत्तराच्या तासात दिली.
या संदर्भात सदस्य प्रविण दरेकर यांनी प्रश्न उपस्थित केला होता. त्यावर उत्तर देताना मंत्री देसाई यांनी सांगितले की, महानगरपालिका क्षेत्रातील चार हजार चौरस मीटरपेक्षा अधिक क्षेत्रफळाच्या गृहप्रकल्पांमध्ये आर्थिकदृष्ट्या दुर्बल घटकांसाठी (EWS) किमान २० टक्के सदनिका राखीव ठेवणे बंधनकारक आहे. मात्र, नाशिकमधील काही विकासकांनी या नियमाला विरोध दर्शवत म्हाडाच्या हिश्श्यातील सदनिका व भूखंड देण्यास टाळाटाळ केली.
या प्रकरणी महसूल विभागाने सादर केलेल्या अहवालाच्या आधारे संबंधित आरोपींची नावे समोर आली आहेत. यानंतर प्रशासनाने तत्काळ हालचाल करत गुन्हे दाखल केले असून तपास प्रक्रियेला वेग देण्यात आला आहे.
मंत्री देसाई यांनी पुढे सांगितले की, नाशिकचे पोलीस आयुक्त यांच्याशी या प्रकरणाबाबत सविस्तर चर्चा करण्यात आली आहे. आरोपींची पडताळणी, त्यांच्यावर लागू असलेल्या कलमानुसार अटक प्रक्रिया तसेच इतर सर्व कायदेशीर बाबी सर्वोच्च प्राधान्याने हाताळण्याचे निर्देश देण्यात आले आहेत.
दरम्यान, या कारवाईमुळे गृहनिर्माण क्षेत्रातील नियमांचे उल्लंघन करणाऱ्या विकासकांवर मोठा धाक निर्माण होणार असून, आर्थिकदृष्ट्या दुर्बल घटकांना त्यांच्या हक्काच्या घरांसाठी न्याय मिळण्याची अपेक्षा व्यक्त केली जात आहे.
